Аҟәа. Хәажәкырамза 29, 2024 шықәса. Аԥсныпресс. Ф.А.Искандер ихьӡ зху аурыс драматә театр аҿы Уилиам Шекспир ипиеса ала иқәыргылоу аспектакль «Виндзортәи аҳәса цәикқәа» алаԥшхгара мҩаԥысит.
Хәажәкырамза 31, мшаԥымза 1 рзы Ф.А. Искандер ихьӡ зху Аԥснытәи аҳәынҭқарратә драматә театр аҿы Уилиам Шекспир икомедиа «Виндзортәи аҳәса цәикқәа» аԥхьарбара мҩаԥысуеит. «Ари атеатр Уилиам Шекспир идраматургиа раԥхьатәи азхьаԥшра ауп, уи лассы-лассы атеатралтә сценақәа рҿы ишцәырымҵуагьы, аха еицырдыруа англызтә гени егьырҭ икомедиақәа џьара акала иаҵамхо, илыԥшааху акомедиа идырны азхьаԥшра ауп», - ҳәа иаҳәоит Аԥснытәи аҳәынҭқарратә драматә театр апресс-маҵзура аҳәамҭа аҿы.
Акомедиа «Виндзортәи аҳәса цәикқәа» (егьи аиҭага аҿы – «Виндзортәи аҵәылхыҩҳәсақәа») Уилиам Шекспир иԥсы анҭаз – 1602 шықәсазы - «Сер Џьон Фальстафии виндзортәи аҵәылхыҩҳәсақәеи ирыхҳәаау даара лафҳәарала еиҿкаау цәгьала игәмырҿыӷьгоу акомедиа» («Чрезвычайно занятная и весьма остроумная комедия о сэре Джоне Фальстафе и виндзорских насмешницах») ҳәа даара иуадаҩыз ахьӡ аманы - знык ауп ианҭыжьыз. Ари акомедиа аҿы Уилиам Шекспир афантастикеи арԥшӡара-ҩычаратә стили ракәӡам ихы иаирхәаз, уи узырлахҿыхуа, угәалаҟазаара шьҭызхуа абзазаратә алаԥшхгара аҳасабала, зықәра зфахьоу аԥсықымқым-амгәарыхә, ауаҩышәпа, амцҳәаҩ, ахәымџьарԥыртла ҳәа изышьҭоу, змазара хыда инызххьоу аҳҭынратә рыцар сер Џьон Фальстаф зхадараҿы дыҟоу ибеиоу акомедиатә типқәа рколлекциа цәыригоит. Ас еиԥш аперсонажқәа Уилиам Шекспир икомедиақәа жәпакы рҿы иуԥылоит. Акомедиа афабула игәмырҿыӷьгоу ацәаҩа аҟәнуп. Зматериалтә ҭагылазаашьа арҽеира иашьҭоу зықәрахь инеихьоу аших, амшгаҩ, аҳәса ирышьҭоу Џьон Фальстаф ҩыџьа амал змоу, иҭаацәарахахьоу аҳәса дреиҽырбарц иӡбоит. Иара урҭ абзиабаратә цҳамҭақәа рзиишьҭуеит. Убри инаркны иара лафҳәарала ахыхәмарра, иаалырҟьаны иҟало ахҭысқәеи ицәыҵагызмалу ацәгьаршрақәеи рыла игәылҭәаау аус ԥылҳаҭ далагалахеит, уи дрықәшәоит акырӡа иччарху аҭагылазаашьақәа. Урҭ зегьы еиқәзырҽаҽо абанҭ, иара дзышьҭалаз аҳәса, «виндзортәи аҵәылхыҩҳәсақәа» роуп. Ахәаԥшыҩ иҿаԥхьа, ацәыргақәҵа аҿы еиԥш иқәгылоит акомедиатә персонажқәа рацәаны. Џьон Фальстаф ихаҿсахьеи уи дзықәшәаз ахҭықәеи рнаҩсгьы, абарҭ атипқәа рыла ауп, апиеса ихадоу акомедиатә ҵакы злашьақәгыло. Акомедиа аҿы ишаанагара иҟоу амшгаҩцәа, аҟалҭырқәа, ахара имхәыцуа, уҳәан-сҳәан абзиабаҩцәа, аҽхарззалацәа, ахӡыргаҩцәа, аԥара азы зегьы ирызхиоу апровинциалтә «аамсҭабжа-амешьанцәа», зхы зымабзианы «акыр злоу», зҽаруазаҟьны ихатәроу, ичаху, акырӡа хара имхәыцуа ауаа гаӡақәа рхаҿы аазырԥшуа аформақәеи аҟазшьаҷыдарақәеи зегьы еизгоуп. Убри аан акомедиа «Виндзортәи аҳәса цәикқәа» ахәаԥшыҩ илабжьара иазкӡам, уи иҳалалу алахҿыхрала игәылҭәаау, акомедиатә ҭагылазаашьақәеи иччарху ахҭысқәеи рыла ишьақәгылоу акомедиа ауп. Араҟа аҳра ауеит аԥсҭазаареи иҟоу-шыҟоу ала аԥсҭазаара абзиабареи.
Арежиссиор Антон Корнилов ажурналистцәа ирзеиҭеиҳәеит аспектакль ақәыргылареи атеатр атруппа аус рыдулареи шымҩаԥысуаз атәы.
«Ари аклассикатә пиеса ауп. Жәаҳәарада, ҳара маҷк аркьаҿрақәа ҟаҳҵеит, аха урҭ радикалла атрактовка анырра анамҭаӡеит», - ҳәа иазгәеиҭеит иара.
Арежиссиор 12-ҩык актиорцәа злаху имасштабу, ақәыргылара ду аҿы, атруппа ахацәа реилазаара зегьы уахь иналаҵаны, ирацәаны акостиумқәеи адекорациақәеи ахархәара аиуеит ҳәа иазгәеиҭеит.
Уи иажәақәа рыла, атеатр амаҵзурақәа ҳәоуеиқәарала русура иабзоуаны аусураҿы изеиԥшразаалак ауадаҩра цәырымҵӡеит, зегьы акыр иҭышәынтәаланы иҩаԥысуан.
Аспектакль ақәыргылара аидеиа шԥацәырҵи ҳәа азҵаара аҭак ҟаҵо арежиссиор иҳәеит:
«Раԥхьаӡа иргыланы, – уи атеатр азыҳәара акәын. Сара, режиссиорк иаҳасабала, Уилиам Шекспир ирҿира даараӡа исзааигәоуп, уи сара зегьы реиҳа бзиа избо авторуп. Саныстудентыз аамҭазы сара исыман актиортә усумҭақәа, уаҟа сара адраматург дуӡӡа ирҿиара еиҳа аилкаара азы алшара сыман. Уажәы уи апрофессионалтә қәгылароууп, уи сара сзы акырӡа аанагоит», -ҳәа иҳәеит иара.
Антон Корнилов иара изы аԥснытәи актиорцәа аус рыцура даара иманшәалан ҳәа инаҵшьны иазгәеиҭеит.
«Сара аҭыԥантәи актиорцәа аус рыцура даараӡа исзыманшәалан, гәыҩбарак ҟамҵакәа атруппа аусура ахәшьара ҳарак асҭарц сылшоит. Иансаамҭаз сара еиуеиԥшым ақалақьқәа рҿы еиуеиԥшым асценақәа рҿы аспектакльқәа ықәсыргылахьан, убри аҟнытә сара еиҿсырԥшыша сымоуп. Араҟа зегьы даара профессионалла еиҿкаауп. Ауаа ашьыжь инакны хәлаанӡа атеатр аҿы иҟоуп, уахынлагьы ианаанкыло убап, ҳара ҳус аҿы даҽакалагьы иауӡом. Аԥсны аспецифика ҳасаб азуны, избоит, ауаа ари аус инагӡаны рымчи –рыхшыҩи рылшарақәеи зегьы азкра ишазхиоу», - ҳәа иҳәеит иара.
Антон Корнилов акыр ҵуеит иара икомедиатәу џьара акы ақәыргыларазы агәазыҳәара шимаз азгәеиҭеит.
«Атруппа хыԥхьаӡара мыцху идуӡам, убри аҟнытә акомедиақәа зегьы ақәыргылара залымшахаргьы ауеит. Ҳара иалаҳхит ахәаԥшцәа ргәы ԥызымҵәахьоу, аинтерес рызцәырызгаша иоригиналтәу апиеса», - ҳәа иазгәеиҭеит иара.
Аспетакль «Винзортәи аҳәса цәикқәа» арежиссиор Антон Корнилов Аурыс драматә театр аҿы ахԥатәи иқәыргыламҭа ауп. Уи деицырдыруеит аспектакльқәа «Иажәыз Хапыгә игәыжь ажәабжь» («Рассказ мула старого Хабуга»), «Ашәахәақәа рыҩныҵҟа» («В лучах» ), ала, уи асахьаҭыхыҩ Ирина Уколовеи иареи аеффективра злоу, игәышьҭыхгоу, иччарху, иԥшӡоу, адекорациақәеи акостиумқәеи рыла ибеиоу, ахәаԥшцәа даара хра злоу ацәаныррақәа рызцәырызгараны иҟоу аспектакль-аныҳәа аԥиҵоит. Сер Џьон Фальстаф ироль наигӡоит Кирилл Шишкин, уи ишькылкыҩ (апаж) Робин ироль наигӡоит – Аԥсны зҽаԥсазтәыз артист Џьамбул Жорданиа. Аспектакль аҿы аус руеит зеиӷьаҟам артистцәа жәпакы: Аԥсны зҽаԥсазтәыз артистка Анна Гиурегиан, Симона Спафопулои Емиль Петрови, Рубен Депелиани Руслан Жьибеи, Марина Скворцовеи Лиупчо Спасови, Саид Лазбеи Ирина Делбеи, Леон Жьибеи Екатерина Барышевеи. «Виндзорские проказницы» - третья постановка Корнилова в РУСДРАМе. Первым спектаклем стал «Рассказ мула старого Хабуга», второй - «В лучах».
Атеатр адиректор Хада Иракли Хьынҭәба Аурыс драматә театр есымша иҟанаҵо зегьы аҩаӡара ҳаракы аҿы анагӡареи ахәаԥшцәа рыршанхареи рзы аҽазышәарақәа ҟанаҵоит, ҳәа иазгәеиҭеит.
«Уажәгьы ҳара аинтерес зҵоу џьара акы ҳалҳаршеит ҳәа агәаанагара сымоуп. Ақәыргылара аганахьала ари даара ибзиоу аспектакль ауп, уи аеффектқәа, аԥсшӡара ала игәылҭәаауп. Актиортә усура акәзар, уигьы даара иуадаҩуп, избан акәзар актиорцәа иааиԥмырҟьаӡакәа апроцесс аҩныҵҟа иҟазар рыхәҭоуп, дара-дара русура еимадазароуп, уи максималла аҽеизакра аҭахуп», - ҳәа иҳәеит иара.
Иракли Хьынҭәба иажәақәа рыла, ари аспектакль актиорцәа зегьы рхы аарԥшра азы алшара аԥнаҵоит. Убри аҿы ауп уи ауникалреи, аамҭак ала ауадаҩреи ахьыҟоу.
«Актиор аспектакль аамҭа зегьы иалагӡаны афырхаҵа иҟазшьа аарԥшра илымшозар, аспектакль қәҿиара амоур ҟалоит, аха ҳара даараӡа ҳрықәгәыӷуеит ҳартистцәа. Ҳара ҳатруппа акыр иӷәӷәоуп, азанааҭтә дырра аҩаӡара ҳаракуп, убри азы ауп ҳара Шекспир ирҿиамҭа азхьаԥшрагьы заҳгәаӷьызгьы. Уи ирҿиамҭақәа рыла аспектакльқәа рықәыргылареи рыхәмарреи имариам усуп. Уи азы актиортә ресурсқәеи аматериал аус адулара зылшо арежиссори аҭахуп», - ҳәа иҳәеит иара.
Иракли Хьынҭәба Антон Корнилови атеатр атруппеи русеицурала иқәыргылаз раԥхьатәи аспетакльқәа ҩба даараӡа қәҿиарала имҩаԥысит ҳәа иазгәеиҭеит.
«Уильиам Шекспир ирҿиамҭақәа урзааҭгылозар, сара сгәаанагарала Антон Карнилов – ари хра злоу аԥсҭазааратә цәырҵрақәа разышәаҳәаҩ иакәны дыҟоуп. Иара иқәиргыло аспектакльқәа зегьы рҿы аԥхара зҵоу ауаҩытәыҩсатә цәаныррақәа, ақьиара, аразра, алашара, уҳәа хра злоу ацәаныррақәа аҳра рует. Иара ихаҭагьы уа иҟоу уаҩуп, акыр даамсҭашәоуп, игәы разуп. Ари аматериал аҿы ҳара зегьы ҳзы акыӡа зҵазкуа, ауаҩы иԥсы, идоуҳатә беиара, уҳәа ауаҩы дзырхәыцша амоментқәа маҷымкәа иҟоуп. Антон Корнилов агәырҿыхреи агәы абаареи зылшо уаҩуп, уи иара иҷыдаҟазшьаны илоуп. Иара аемоциақәа аартны, ишиашоу ахәаԥшыҩ иҟынӡа анагара алзыршо еицырдыруа Вахтанговтәи ашкол иреиӷьу атрадициақәа шьҭызкааз иоуп. Сара сгәаанагарала даара аинтерес зҵоу усумҭа ҳзыԥшуп. Ари апиеса шамахамзар даара имаҷны иқәдыргылоит, ҳара иаҳҭахуп ари аҩыза аексклиузив ҳамазарц. Маиаковски итеатр аҿы аамҭак ала ари аспектакль ықәдыргылеит асцена маҷ аҿы», ҳәа иажәа хыркәшо инацҵаны иазгәеиҭеит Иракли Хьынҭәба.
Џьон Фальстаф ироль назыгӡо актиор Кирилл Шишкин, иусураҿы раԥхьаӡа акәны Шекспир ирҿиамҭа ала ахәмарра иқәшәеит ҳәа иазгәеиҭеит.
«Аинститут саналга ашьҭахь аамҭак иалагӡаны артист асценаҿы иҟазаара аҟазара арҵаҩыс аус зуан. Сыстудентцәа срыцхраарц азы, сара ари ароль ацыԥҵәаха сыхәмаруан. Ҳара агәыӷра ҳамоуп ахәаԥшцәа ргәалаҟазаара ашьҭыхреи рырччареи ҳалҳаршап ҳәа. Сара хаҭала сзы зегьы реиҳа иуадаҩны иҟоу Антон ԥсшьара ахьуимҭо, антрактқәа раангьы уԥсы аиҭакха уоуӡом, убри аҟара идууп уи иусуратә лшарамч», - ҳәа иҳәеит Кирилл Шишкин.
Уи иара убас иажәа иацҵо иазгәеиҭеит аспектакль аҿы иара ифырхаҵа иаарԥшра азы инацҵаны амаҭәа ахархәара шаиуо. «Сара шьҭа «сышәпара» сашьцылеит ҳәа уҳәаратәы иҟоуп. Ари сара ас еиԥш «аҭеиҭыԥш сыманы» сызлаху ахԥатәи аспектакль ауп», - ҳәа иҳәеит иара. Кирилл Шишкин иперсонаж акыр игәы шизыбылуа азгәеиҭеит. «Сара уи даараӡа бзиа дызбоит. Уи даара иџьбароу, зыгәҭакы иацәхьамҵуа хаҵоуп. Зматериалтә ҭагылазаашьа арҽеира иашьҭоу зықәрахь инеихьоу аших, амшгаҩ, аҳәса ирышьҭоу арыцар Џьон Фальстаф ҩыџьа амал змоу, иҭаацәарахахьоу аҳәса дреиҽырбарц иӡбоит. Иара урҭ абзиабаратә цҳамҭақәа рзиишьҭуеит... Ииашаны сеилышәкаарц сҭахуп, сара ас еиԥш иҟоу ауаа даараӡа срыҵашьыцуеит, избан акәзар, урҭ еиҿартәышьала еихҳәа-еиҵҳәа ишыҟамгьы, ԥшрала-сахьала митәык улаҿы ишымааиуагьы, уеизгьы рхы бзиа ирбоит, рхы иақәгәыӷуа адәы иқәуп», - ҳәа иҳәеит иара.
Акомедиа «Виндзортәи аҳәса цәикқәа» аԥхьарбара мҩаԥысуеит хәажәкырамза 31, мшаԥымза 1, асааҭ 19.00 рзы. Аспектакль х-сааҭк ицоит, ҩ-антракт ацуп.
