Аҟәа. Хәажәкырамза 29, 2024 шықәса. Аԥсныпресс. Аҟәа ақалақь аҩныҵҟатәи аусқәа Русбарҭа ашьаусԥшааратә ҟәша аусзуҩцәа аҳҭнықалақь аџьармыкьа Хада иахьаҵанакуаз иааныркылеит анаркотикатә маҭәашьарқәа рыҭира азы игәҩароу Урыстәылатәи Афедерациа ҩыџьа атәылауаа – 1979 шықәсазы ииз Казань ақалақь аҿы инхо Орлов Алеқсеи Владимир-иԥеи 1985 шықәсазы ииз Москватәи аобласт аҿы инхо Сорокина Евгениа Андреи-иԥҳаи.
Аԥсны аҩныҵҟатәи аусқәа Рминистрра апресс-маҵзура иҟанаҵо адыррақәа рыла, хаҭала игәаҭараан Орлов Алеқсеи иеиқәа аџьыба аҿы ирыԥшааит иагьимырхит ишкәкәоу, аххыраԥшра змоу, икристаллрку амаҭәашьар згәылаз 23 еилаҳәара, Сорокина Евгениа илыдырбалеит – аиԥш-зеиԥшу амаҭәашьар згәылаз 19 еилаҳәара.
Анаҩс иаанкылаз ауаа алархәны уаанӡа иҟаҵаз имаӡоу аҭаҵәахтә ҭыԥқәа ахьыҟаз аҵакыра аҿы агәаҭарақәа мҩаԥган. Аҟәа ақалақь, Инал-иԥа имҩала, Орлов Алеқсеи иаирбаз аҭыԥқәа рҿы ирыԥшааит ишкәакәоу, икристаллрку амаҭәашьар згәылаз х-еилаҳәарак. Аиԥш-зеиԥшу амаҭәашьар згәылаз даҽа х-еилаҳәарак амилициа аусзуҩцәа ирыԥшааит Сорокина Евгениа Аиааиа апроспект ала уаанӡа иҟалҵахьаз имаӡоу аҭаҵәахтә ҭыԥқәа рҿы.
Атәылауаа Орлов Алеқсандри Сорокина Евгениеи аамҭала иахьынхоз аҭыԥ аҿы агәаҭарақәа рымҩаԥгараан амилициа аусзуҩцәа ирыԥшааит даҽа 158 ацаха ҟаԥшь ала еидҿаҳәалаз аилаҳәарақәа. Урҭгьы ишкәакәоу, икристаллрку амаҭәашьар ргәылан. Аиԥш-зеиԥшу амаҭәашьар ргәылан Сорокин Алеқсандр ихатәы маҭәа иацны аполиетилентә пакет иҭаз аилаҳәарақәагьы. Зынӡа Соколова Евгениа лымаҭәақәа зҭаз ачемодан аҟынтәи иҭыган 222 еилаҳәара.
Аҟәа ақалақь аҩныҵҟатәи аусқәа Русбарҭа аусеилыргаратә ҟәша Алеқсеи Орлови Евгениа Сорокинеи рганахьала Аԥсны Аҳәынҭқарра Ашьаустә Закәанеидкыла ахәҭаҷ 224, ахәҭа 3 апункт «в» иазԥхьагәанаҭо ацәгьоура аҟазшьақәа рыла (анаҩс аҭира хықәкыс иҟаҵаны, даҽакала иуҳәозар, гәыԥҩык ауаа рцәыҵеицәажәара ала зыкапан дуу анаркотикатә маҭәашьар изакәанымкәа аахәара, аҵәахра, аиагара азы) ашьаусеилыргара хацнаркит.
Ирымхыз анаркотикатә маҭәашьар азеиԥш капан 177,714 грамм. рҟынӡа инаӡоит.
Игәҩароу Орлов Алеқсандри Соколова Евгениеи рганахьала Аҟәатәи ақалақьтә ӡбарҭа ала ахьырхәра аҳасабала иалхуп 2-мыз аҭакрала ахгара.
