Иара убас имҩаԥысит Аслан Бжьаниеи Рашид Нургалиеви реиԥылара. Ахадеи Урыстәылатәи  Афедерациа Ашәарҭадаратә Хеилак амаӡаныҟәгаҩ Актәи ихаҭыԥуаҩи азааҭгылеит ашәарҭадара аусхк аҟны  азеиԥш проектқәа реицынагӡаразы аԥсны-урыстәылатәи аганқәа аԥхьаҟатәи русеицзура аҳәаақәа рырҭбаара.

Аслан Бжьаниа иусуратә визит аҳәаақәа ирҭагӡаны даҭааит Урыстәылатәи Афедерациа адәныҟатәи аусқәа рминистрра, ара агәаларшәагатә шәҟәаҿы «Крокус Сити Холл» иҟалаз атеракт иахҟьаны иҭахаз ргәалашәара ахьӡала анҵамҭа аанижьит. Адәныҟатәи аусқәа рминистрра аҟны имҩаԥысыз аиԥылара анаҩс, ажурналистцәа рыпресс знеираҟны Аҳәынҭқарра Ахада иазгәеиҭеит «атерроризм цәгьашақә иузыҟоу аҳәынҭқаррақәа   мыругаҵас рхы иадырхәоит» ҳәа ишиԥхьаӡо. «Атеракт хатә трагедиак аҳасабала иҳадаҳкылеит. Сара атерроризм закәу здыруеит, Аԥсны иҷыдоу амаҵзура сахагылан ианаамҭаз, иаартны иуҳәозар, ас еиԥш иҟоу ацәырҵрақәа еиҭа ҟалашьа амаӡам ҳәа ҳгәы иаанагон, аха иҟалаз ҟалеит.  Сара агәра згоит иҷыдоу урыстәылатәи амаҵзурақәа ари аус аҟны хьаҵрак ҟарҵараны ишыҟам.

Аслан Бжьаниа иҳәеит Аԥсны жәлар зегьы иҭахаз рҭаацәеи ртынхацәеи рхьаа шрыцеиҩыршо. Иҳәеит иара убас ахәыҷқәа Аԥсныҟа рааԥхьара дшазхиоу «ас еиԥш агыгшәыгратә акт ахҟьа-ԥҟьақәа излауала рырмаҷразы, изалауала ацхыраара рыҭаразы». Ихәеит Урыстәыла ари аҩыза уаҳа иҟаларым ҳәа дышгәыӷуа. 

Хәажәкырамза 27 рзы Аԥсны Ахада Урыстәылатәи Афедерациахь иусуратә ныҟәара хыркәшан.