Аҟәа. Хәажәкырамза 21, 2024 шықәса. Аԥсныпресс. Хәажәкырамза 20, 2024 шықәса рзы Аҟәа ақалақь апрокуратура Сергегиа Ҭенгиз Игор-иԥа иганахьала Аԥсны Ашьаустә Закәанеидкыла ахәҭаҷ 217, ахәҭа 1 (абџьар изакәанымкәа аахәара, аиагара, аҭира, аҵәахра, аныҟәгара), ахәҭаҷ 99, ахәҭа 1 (ауаҩшьра) иазԥхьагәарҭо ацәгьоурақәа рыла ашьаусеилыргара хацнаркит, ҳәа адырра ҟанаҵоит Апрокуратура Хада апресс-маҵзура.
Заанаҵтәи аусҭҵаара аусбарҭа ишышьақәынаргылаз ала, хәажәкырамза 20, 2024 шықәса, 20 сааҭи 10 минуҭи рзы, Сергегиа Ҭенгиз Игор-иԥа зкузов шкәакәоу, автомашьына «Mercedes-Benz» (амодель «S-222», ашәҟәҭагаларатә номер О 840 ОВ – АВН змоу) ала Ханазариан А.С дахьыҟаз, Аҟәа ақалақь Коӷониа имҩала игылоу аҩны №37 ахь днеит.
Ҭенгиз Сергегиа имаз зыхкы макьаназы ишьақәыргылам, аха зыхҭаларшә 9 мм. рҟынӡа инаӡо абџьар ала гәҭакыла Ханазариан А.С жәынтә диеихсит. Убри иахҟьаны Ханазариан иара уааҵәҟьа иԥсҭазаара далҵит.
Уажәы Сергегиа Ҭенгиз дахьыҟоу аҭыԥ аилкаареи уи иаанкылареи азы аоператив-ԥшааратә усмҩаԥгатәқәа мҩаԥысуеит.
