Аҟәа. Хәажәкырамза 7, 2024 шықәса. Аԥсныпресс. Аԥсны адәныҟатәи аусқәа рминистр Инал Арӡынба Приднестровтәи Молдавтәи Ареспублика иҟоу Аԥсны азинмчы змоу ахаҭарнак Алеқсандр Ватаман ихьӡала Приднестровтәи Молдавтәи Ареспублика иҟоу Аԥсны Аофициалтә Хаҭарнакра аԥҵара 16-шықәса ахыҵра инамаданы адныҳәаларатә цҳамҭа ишьҭит, ҳәа адырра ҟанаҵоит Аԥсны адәныҟатәи аусқәа Рминистрра апресс-маҵзура.
«Ҳаҭыр зқәу Алеқсандр Владимир-иԥа! «Приднестровтәи Молдавтәи Ареспублика иҟоу Аԥсны Аофициалтә Хаҭарнакра Приднестровтәи Молдавтәи Ареспублика аҳҭнықалақь Тирасполь аҿы аԥҵара азы» Аусԥҟа анапаҵыҩра ҟалеижьҭеи 16-шықәса аҵра инамаданы гәык-ԥсыкала сшәыдныҳәалоит.
Аусшәҟәы анапаҵыҩра Аԥсны Аҳәынҭқарреи Приднестровтәи Молдавтәи Ареспубликеи рыбжьара аизыҟазаашьақәа рыҿиара аҿы ихадоу хҭысны иҟалеит. Ахаҭарнакра аусура аԥсны-приднестровтәи аизыҟазаашьақәа рыҿиара хра злоу анырра анаҭоит», -ҳәа иазгәаҭоуп адныҳәаларатә цҳамҭа аҿы.
Аԥсны адәныҟаполитикатә Хылаԥшырҭа ахада Приднестровтәи Молдавтәи Ареспублика иҟоу Аԥсны Аофициалтә Хаҭарнакра аринахысгьы активла аусура шынанагӡо азы агәыӷра шимоу ааирԥшит.
Инал Арӡынба Алеқсандр Ватаман игәҭакқәа зегьы рынагӡареи аихьӡара ҿыцқәеи аманшәалареи изеиӷьаишьеит.
