Аҟәа. Хәажәкырамза 7, 2024 шықәса. Аԥсныпресс. Аԥсны адәныҟатәи аусқәа Рминистрра аҿы имҩаԥысит Аԥсны адәныҟатәи аусқәа рминистр ихаҭыԥуаҩ Иракли Ҭыжәбеи Приднестровтәи Молдавтәи Ареспублика адәныҟатәи аусқәа рминистр ихаҭыԥуаҩ Алеқсандр Стециуки реиԥылара.
Аиԥылара аҳәаақәа ирҭагӡаны ирылацәажәеит аԥсны-приднестровтәи аусеицура хадара злоу аспектқәа, иара убас аҩганктәи аусеицура активизациа азҵаарақәа ирзааҭгылеит.
Аганқәа ҷыдала ахшыҩзышьҭра арҭеит аҵыхәтәантәи аамҭазы Молдова аганахьала еиҳа-еиҳа зыҽзырӷәӷәо иалагаз аполитика-дипломатиатә қәыӷәӷәара инамаданы Приднестровие ишьақәгылаз аҭагылазаашьа.
Аиԥылара иалахәыз аиҩызареи аиашьареи рыла ишьаҭарку аҩганктәи аизыҟазаашьақәа аринахысгьы рырҿиара ишазхиоу инаҵшьны иазгәарҭеит.
Аиԥылара иара убас рхы аладырхәит Аԥсны иҟоу Приднестровтәи Молдавтәи Ареспублика Аофициалтә Хаҭарнакра ахада Гарри Кәпалбеи Аԥсны адәныҟатәи аусқәа Рминистрра астратегиатә усеицура адепартамент аиҳабы Џьамал Бганбеи.
