Аҟәа. Хәажәкырамза 7, 2024 шықәса. Аԥсныпресс. С.Ҷанба ихьӡ зху Аԥснытәи адраматә театр адиректор Хада Алхас Ҷолокуа хәажәкырамза 10-11 рзы Уфа ақалақь аҿы имҩаԥысраны иҟоу IV акультуратә форум «АРТ-Курултай» аусура ихы алаирхәуеит. Афорум аусура рхы аладырхәраны иҟоуп иара убас Белорусиа, Аладатәи Кореиа, Китаи, уҳәа егьырҭ атәылақәа рхаҭарнакцәа.
Афорум «АРТ-Курултай» аусуратә программа иалалоит апленартә еилатәара, алекциақәа рҿы аусура, асеминарқәа-апрактикумқәа, аексперттә плошьадкақәа.
Афорум аусура аихшьаалақәа рыҟаҵара мҩаԥгахоит хәажәкырамза 11 рзы Башкириатәи аҳәынҭқарратә аопереи абалети ртеатр аҿы имҩаԥгахо апленартә еилатәара «Культура в диалоге времен» аҿы. Аилатәара рхы аладырхәраны иҟоуп Ареспублика Башкортосҭан Ахада Ради Хабирови Урыстәылатәи Афедерациа акультура аминистр Ольга Лиубимовеи.
