Аҟәа. Хәажәкырамза 4, 2024 шықәса. Аԥсныпресс. Урыстәылатәи Афедерациа аспорт аминистр иабжьгаҩ, Смоленсктәи аобласттә Дума адепутат, Аконцерн «Росэнергоатом» ҳаамҭазтәи аспорттә технологиақәа Рцентр адиректор хада Сергеи Фомин Сергеи Багаԥшь (04.03.1949 – 29.05.2011) диижьҭеи 75-шықәса аҵра инамаданы Аԥсны Аҳәынҭқарра Ахада ихьӡала ашәҟәы ааишьҭит.
Ашәҟәы атекст аҿы иаҳәоит:
«Иахьа Урыстәыла амҵәышәмпылтә спорт аилазаара зегьы ҳаҭырла, гәыблыла дыргәаладыршәоит рҩыза бзиа, ауаҩы разы, иналукааша аполитик, ауаажәларратә усзуҩ, атәылауаҩ, иԥсадгьыл ссир апатриот иаша - Сергеи Уасил-иԥа Багаԥшь. Иахьа ари ауаҩ бзиа иԥсы ҭазҭгьы ихыҵуазаарын 75 шықәса.
Ҳара Сергеи Уасил-иԥа згәы ҭбааз, аӡәы сабаицхраари ҳәа иҟаз ауаҩы, аспортсмен бзиа амҵәышәмпыласҩы иаҳасабала даҳгәалашәоит, уи наунагӡа ҳгәаҵаҿы даанхоит.
Данқәыԥшыз иара даара амҵәышәмпыласҩы бзиан, анаҩсгьы иара иԥсҭазаара зегьы иалагӡаны хаҭала ацхыраареи аҳәнҭқарратә дгылареи аиҭон ари аспорт хкы Аԥсны аҿиара. Иара иҿыԥшны жәаҩыла аҷкәынцәеи аӡӷабцәеи аспорттә залқәеи амҵәышәмпылтә секциақәеи рахь инеихьан, аӡәырҩы ари аспорт рыԥсҭазаара адырҳәалеит.
Ҳара ҳазгәдууп абар шьҭа ашықәсқәа инеиԥынкыланы Пицунда ақалақь аҿы Сергеи Уасил-иԥа Багаԥшь ихьӡ зху Ахраҿа агара азы амҵәышәмпыл 3×3 атурнир ахьымҩаԥааго. Ҳазҭоу 2024 шықәсазгьы Сергеи Уасил-иԥа Багаԥшь диижьҭеи 75-шықәса аҵра инамаданы иазԥхьагәаҭаны иҳамоуп ахәыҷқәеи хықәра наӡоу ахацәеи рзы амҵәышәмпыл 3×3 аныҳәа ду амҩаԥгара.
Агәра ганы ҳаҟоуп, ари ауаҩ бзиаӡа игәалашәара ҳара ҳагәқәеи аԥсуа жәлар ргәалашәареи рҿы акыр аамҭа ишаанхо, насгьы аԥсуа мҵәышәмпыл ессааира ишыҿиало, иара убри ала аҟыбаҩ злоу ауаа маҷымкәа ишаанарԥшуа».
