Аҟәа. Хәажәкырамза 4, 2024 шықәса. Аԥсныпресс. Аԥсны Анапхгареи ареспублика аспорттә еилазаареи рыхьӡала Сергеи Багаԥшь (04.03.1949 – 29.05.2011) диижьҭеи 75- шықәса аҵра инамаданы ашәҟәқәа аауеит.
«Иахьа Урыстәыла амҵәышәмпыласыҩцәа аӡәырҩы, Ареспублика Аԥсны аспорттә еилазаара зегьы дыргәаладыршәоит ауаҩы шьахә, амҵәышәмпыласҩы бзиа, ауаажәларратә усзуҩ нага Сергеи Уасил-иԥа Багаԥшь.
Иахьа Сергеи Уасил-иԥа Багаԥшь иԥсы ҭазҭгьы ихыҵуан 75-шықәса.
Сара насыԥ сыман хаҭала Сергеи Уасил-иԥа Багаԥшь идырра, иҿцәажәара. Сара сзы иара Аԥсадгьыл атәылауаҩ, апатриот иаша ҳәа ззырҳәо уаҩын. Ҷыдала иазгәасҭарц исҭаху, Сергеи Уасил-иԥа ихаҭа амҵәышәмпыласҩы шьахәны дшыҟаз, уи ари аспортхкы ахь имаз абзиабара иԥсҭазаара зегьы иалганы активла Аԥсны амҵәышәмпыл аҿиара дацхраауан, Аԥсны амҵәышәмпыл Афедерациа аԥиҵеит, ирацәаны атурнирқәа мҩаԥигон.
Агәра ганы сыҟоуп, уи иус аринахысгьы ишацҵахо, амҵәышәмпыл ареспублика аҿы аҿиара шаиуо, атурнирқәа шеиҿкаахало, аҟыбаҩ злоу аспортсменцәа рабиԥара ҿыц шеиҵагыло!» – ҳәа иаҳәоит Асовет Еидгылеи Урыстәылеи Зҽаԥсазтәыз азыҟаҵаҩ, Аолимпиатә чемпион, FIBA ахьӡ-аԥша азал алахәыла, аишьцәа Гомельскиаа рыхьӡ зху амҵәышәмпыл Академиа апрезидент Евгени Иаков-иԥа Гомельски иааишьҭыз ишәҟәы аҿы.
Ихәҭаахьала, Евгени Гомельски Аԥсны амҵәышәмыласыҩцәа есымша илшо ала ацхыраареи адгылареи рыҭара дшазхиоу азгәеиҭеит.
