Аҟәа. Хәажәкырамза 4, 2024 шықәса. Аԥсныпресс. Иахьа Аԥсны Аҩбатәи Ахада Сергеи Уасил-иԥа Багаԥшь иԥсы ҭазҭгьы ихыҵуан 75 шықәса. Аҳәынҭқарра Аҩбатәи Ахада иира Амш аҽны иара анышә дахьамадоу Џьгьарда ақыҭан. Сергеи Багаԥшь иҳаҭгәынаҿ ашәҭшьыҵәрақәа шьҭарҵеит Аԥсны Аҳәынҭқарра Ахада Аслан Бжьаниа, Аҳәынҭқарра Ахада ихаҭыԥуаҩ Бадра Гәынба, Жәлар Реизара-Апарламент Аиҳабы Лаша Ашәба, Аԥсны иҟоу Урыстәылатәи Афедерациа ацҳаражәҳәаҩ Михаил Шургалин, Аахыҵ Уаԥстәыла ԥыхьатәи Ахада Едуард Кокоиты, Урыстәылатәи Афедерациа Аҳәынҭқарратә Дума адепутат, Ихьыԥшым Аҳәынҭқаррақәа русқәеи евразиатәи аинтеграциеи аџьынџьуаа рымадареи рзы Аҳәынҭқарратә Дума Аилак ахантәаҩы актәи ихаҭыԥуаҩ Константин Затулин, Аԥсны иҟоу Аахыҵ Уаԥстәыла ацҳаражәҳәаҩ Олег Боциев, Молдавтәи Приднестровтәи Ареспублика Аофициалтә Хаҭарнакра ахада Гарри Кәпалба, Аԥсны жәлар Рџьынџьтәылатәи еибашьра аветеранцәа, Аԥсны аполитикатәи ауаажәларратәи еиҿаарақәа рхаҭарнакцәа, ашолхәыҷқәа, астудентцәа, ауаажәларра.
Сергеи Багаԥшь аҳәынҭқарра данахагылаз аамҭазы аибашьра ашьҭахь Қырҭтәыла амчрақәа зхаԥаны иҟаз Кәыдрытәи аҩхаа аҿы Аԥсны аиурисдикциа еиҭашьықәыргылахеит.
Сергеи Багаԥшь ихьӡ адҳәалоуп Аԥсны жәларбжьаратәи азхаҵара аиура.
Аԥсны Аҩбатәи Ахада Сергеи Багаԥшь 63-шықәса дшырҭагылаз иаамҭамкәа иԥсҭазаара далҵит лаҵарамза 29, 2011 шықәсазы. Сергеи Багаԥшь Урыстәылатәи Афедерациа Москватәи аклиникатә хәышәтәырҭа №83 аҿы дышьҭан. Уи игәамбзиара аҭагылазаашьа иҟаз ала, ишьақәыргылан Аԥсны Аҳәынҭқарра Ахада ирыԥҳа акьыба шамаз. Аԥсны Аҩбатәи Ахада ирыԥҳақәа рҿы иҟаҵаз аԥҟара ашьҭахь мчыбжьык ааҵуаны лаҵарамза 27 ауха Аԥсны Аҩбатәи Ахада Сергеи Багаԥшь игәабзиара зынӡа ицәгьахоит. Уи ацхыраара ӷәӷәа шимазгьы, ичымазара дзазымиааикәа идунеи иԥсахуеит. Сергеи Багаԥшь Анышә дамадоуп Очамчыра араион, иқыҭа гәакьа Џьгьарда иани иаби рывараҿы. ***
