Аҟәа. Хәажәкырамза 4, 2024 шықәса. Аԥсныпресс. Аԥсны Актәи Ахада иира Амш аҽны Аҟәа араион Алада Ешыра ақыҭан, Владислав Арӡынба анышә дахьамадоу иҟоу Амемориал амҵан ашәҭ шьыҵәрақәа рышьҭаҵара ацеремониа мҩаԥысит. Владислав Арӡынба ҳаҭырла дыргәаладыршәарц арахь имҩахыҵит Аҳәынҭқарра Ахада Аслан Бжьаниа, Аҳәынҭқарра Ахада Ихаҭыԥуаҩ Бадра Гәынба, атәыла Анапхгара алахәылацәа, Жәлар Реизара-Апарламент Аиҳабы Лаша Ашәба, Апарламент адепутатцәа, Аԥсны иҟоу Урыстәыла аҷыдалкаатә зинмчы змоу Ацҳаражәҳәаҩ Михаил Шургалин, Аахыҵ Уаԥстәыла ԥыхьатәи Ахада Едуард Какоиты, Урыстәылатәи Афедерациа Аҳәынҭқарратә Дума адепутат Константин Затулин, Аԥсны иҟоу Аахыҵ-Уаԥстәыла ацҳаражәҳәаҩ Олег Боциев, Аԥсны иҟоу Приднесторовтәи Молдавтәи Ареспублика аофициалтә Хаҭарнакра аиҳабы Гарри Кәпалба, Арбџьармчқәа рыруаа, аибашьра аветеранцәа, хатәгәаԥхарауаа, иҭахаз аибашьцәа ранацәа, Аԥсны аполитикатәии ауаажәларратәии еиҿкаарақәа рхаҭарнакцәа.
14 шықәса раԥхьа, хәажәкырамза 4, 2010 шықәсазы, акыраамҭа ихьуаз ачымазара ӷәӷәа иахҟьаны иԥсҭазаара далҵит иналукааша аҳәынҭқарратәии аполитикатәии аусзуҩ, ҳаамҭазтәи аԥсуа ҳәынҭқарра ашьаҭаркҩы, аҭоурыхдырҩы-амрагылараҭҵааҩ ду, аҭоурыхтә наукақәа рдоктор, Аԥсны Аҳәынҭқарра Актәи Ахада Владислав Григори-иԥа Арӡынба.
