Егрытәи Аӡфымцатә Станциа адиректор Леуан Мебониа иазгәаҭарақәа рыла, Урыстәылантәи асоциалтә шьаҭала  иаауа афымцамч арезервқәа, Џьвартәи аӡеизакырҭа ааԥынтәи аамҭахәҭа азы иҟоу аӡы аҩаӡара,  иара убас афымцамч аекономиа азы имҩаԥгахо аусмҩаԥгатәқәеи аҭә ҳасаб азуны уахәаԥшуазар, афымцамч ала аиқәыршәара иадҳәалоу аҭагылазаашьа аҭышәынтәалара залыршахар ҟалап хәажәкырамза анҵәамҭа–мшаԥымза алагамҭазы.

Убас ала, Егрытәи Аӡфымцатә Станциа анапхгараҭара иҟанаҵо азгәаҭарақәа рыла, уажәырнахыс ҳаԥхьаҟа  2024-2025 шш. ҭагалан-аӡынәи аамҭахәҭа азы адефицит ахарҭәааразы иазԥхьагәаҭатәу аунагӡатәқәа ралкаара хымԥадатәиуп. Аенергетикцәа ргәаанагарала, аҭагылазаашьа аиҭакразы афымцамч ахархәара априборқәа рышьақәыргылара анаҩс афымцамч аиуразы альтернативатә хыҵхырҭақәа рыԥшаара алыршатәуп.  

Аԥыза-министр Егрытәи Аӡфымцатә Станциа аиҳабы имҩаԥгоу аусурақәа рзы иҭабуп ҳәа иаҳәаны ареспублика аенергетикеи атранспорти Рминистрреи «Амшынеиқәафымцамчи» алархәны апроблема ҽҳәараанӡа аӡбара алыршаразы амҩақәа рыԥшаара иазкны ажәалагалақәа реиқәыршәаразы аԥшьгара ҟаиҵеит.