Андреи Кудимов Аԥсны анапхгара, ареспублика аҳәынҭқарратә мчра аусбарҭақәа аҳәаа ахьчара азы иманшәалоу аҭагылазаашьақәа раԥҵареи Аҳәаахьчаратә Усбарҭа аусзуҩцәа рнырхареи рзы иҟаҵоу ауснагӡатәқәа рзы иҭабуп ҳәа иҳәеит.  

«Ари амш аҽны, 15 шықәса раԥхьа, Аԥсни Урыстәылеи рхадацәа «Ареспублика Аԥсны аҳәынҭқарратә ҳәаа ахьчара азы аусмҩаԥгатәқәа реицынагӡара азы» Аиқәшаҳаҭра рнапы аҵарҩит.  Иара убри ала Урыстәыла Аԥсны аҳәынҭқарратә ҳәаа ахьчара ахахьы иагеит. Иуҳәар алшоит, убасҟан Аԥсны ашәарҭадара ауасхыр шьҭаҵан ҳәа.  Ас еиԥш ахыдҵа анагӡара азы аҭакԥхықәра адҵан Урыстәыла Ашәарҭадара Афедералтә Маҵзура Аҳәаахьчаратә Усбарҭа.  15 шықәса раахыс урыстәылатәи аҳәаахьчаҩцәа ареспублика аҳәаақәа рыхьчара азы арратә маҵзура иахысуеит, урҭ рахьынтә ҩыџьа руалԥшьа анагӡараан иҭахеит».

Сколлегацәа-адипломатцәа  рыхьӡала шәҭаацәеи шәареи аусеицуразы иҭабуп ҳәа шәасҳәар сҭахуп», - ҳәа иҳәеит Аԥсны иҟоу Уыстәыла Ацҳаражәҳәарҭа абжьгаҩ-ацҳаражәҳәаҩ Максим Литвинов.

Аԥсны Аҳәынҭқарратә шәарҭадара Амаҵзура ахантәаҩы Ҭемыр Ахьиба  АШәА Аԥсны Аҳәынҭқарраҟны иҟоу Урыстәыла ААМ Аҳәаахьчаратә усбарҭеи русеицуреи ареспублика аҳәынҭқарратә ҳәаа ахьчаразы еицымҩаԥырго ауснагӡатәқәеи ртәы инаҵшьны иазгәеиҭеит.  

«Иҳараку азанааҭдырра, афырхаҵара, агәымшәара, хьаҳә-хьачарада рҿаԥхьа иқәыргылоу адҵақәа рынагӡара, абарҭ аҟазшьақәа рыла ианакузаалакгьы иалукаауеит Аҳәаахьчаратә Усбарҭа аусзуҩцәа.   

 Уи дырҵабыргуеит аҳәаахьчаратә архәҭақәа рҭакԥхықәра иаҵанакуа аҵакырақәа рҿы имҩаԥгаз еиуеиԥшым аусмҩаԥгатәқәа рылҵшәақәа. Изныкымкәа, Аԥсны Аҳәынҭқарратә шәарҭадара Амаҵзуреи Урыстәыла Аҳәаахьчаратә Усбарҭеи  аоператив-арратә усмҩаԥгатәқәа мҩаԥысуан, аха иазгәаҭатәуп урҭ рымҩаԥгараан ахатәы еилазаара аҿы ацәыӡқәагьы шыҟаз. Иҭахаз ргәалашәара наунагӡа ҳгәаҵаҿы иаанхоит», – ҳәа иҳәеит Ҭемыр Ахьиба.

Аҳәынҭқарреи Аҳәынҭқарратә шәарҭадара Амаҵзура аколлективи рыхьӡала Ҭемыр Ахьиба урыстәылатәи аҳәаахьчаҩцәа ирзеиӷьаишьеит агәабзиара, агәамч, анаҩстәи рырратә маҵзура аҿы аманшәалареи аихьӡарақәеи.

Аҳәаахьчаҩцәа дрыдныҳәалеит иара убас Аԥсны иҟоу Урыстәылатәи Афедерациа абжьгаҩ, Аԥсны иҟоу Урыстәылатәи Афедерациа ашәарҭадара Афедералтә Маҵзура аофициалтә хаҭарнак  Алеқсандр Соболь. Уи урыстәылатәи аҳәаахьчаҩцәеи аԥснытәи рколлегацәеи конструктивла еиҿкаау русеицура азгәеиҭеит.

Алеқсандр Соболь аколлективтә Мраҭашәара аҿагылара иадҳәалоу имариам аамҭа азы аҳәаахьчаҩцәа даҽа аамҭак еиԥшымкәа агәҽанызаареи аҽазҟаҵара бзиеи аадырԥшлароуп ҳәа инаҵшьны иазгәеиҭеит.

Иара агәра ганы иазгәеиҭеит Аҳәаахьчаратә Усбарҭа аусзуҩцәа егьа уадаҩра ыҟазаргьы, рҿаԥхьа иқәгылоу ахыдҵақәа аринахысгьы рынагӡара шрылшо.

Алеқсандр Соболь аҳәаахьчаҩцәа рхыдҵақәа рынагӡараҿы аманшәалареи ашықәснҵыра дууи анасыԥи рзеиӷьаишьеит.

Аусмҩаԥгатә аофициалтә хәҭа ашьҭахь аԥсуа естрада артистцәа алархәны аныҳәатә концерт мҩаԥысит.