«Ҭаҭарсҭани Аԥсни рыбжьара иҟоу аизыҟазаашьақәа аҭоурых ду рымоуп. Нанҳәамза, 1994 шықәса рзы ҳреспубликақәа рыбжьара аиҩызареи аусеицуреи рзы Аиқәшаҳаҭра анапаҵыҩра мҩаԥган.  Аԥснытәи аделегациақәа лассы-лассы ҳреспублика аҿы имҩаԥысуа аусмҩаԥгатәқәа рхы аладырхәуеит. Ҭаҭарсҭани Аԥсни рыбжьара атауареикәыршара амҽхак макьаназы митәык идуумзаргьы, хра злоу адинамика ыҟоуп», — ҳәа инаҵшьны иазгәеиҭеит Ареспублика Ҭаҭарсҭан Ахада.

Иара убри аамҭазы Русҭан Минниханов атуризми асанатор-курорттә хырхарҭеи аусеицура аҳәаақәа рырҭбаараҿы хадара злоу ароль назыгӡо усхкқәанқы иаликааит.  

Русҭам Минниханов Урыстәыла Аԥсны ихьыԥшым исуверентәу ҳәынҭқарраны иазханаҵеит ҳәа еизаз иргәаларшәо аҩ-ҳәынҭқаррак аусеицуреи астратегиатә партниорреи рзы аиқәшаҳаҭра рыбжьоуп, азинтә шьаҭа арӷәӷәара иазкны аусура мҽхакы ҭбаала имҩаԥысуеит, аекономика, агуманитартә усхкы, уҳәа еиуеиԥшым ахырхарҭақәа рыла аиқәшаҳаҭрақәа рыбжьаҵара мҩаԥысуеит ҳәа иазгәеиҭеит.  Ахәҭакахьала, ахәаахәҭра-економикатә усеицура азы аԥсны-урыстәылатәи анапхгарабжьаратәи акомиссиа аус ауеит. Уаҟа Урыстәылатәи Афедерациа аганахьала ацхантәаҩыс дыҟоуп Урыстәылатәи Афедерациа аԥыза ихаҭыԥуаҩ Марат Хуснуллин ҳәа иазгәеиҭеит Русҭам Минниханов.

Аиԥылара иара убас рхы аладырхәит Ареспублика Ҭаҭарсҭан аекономика аминистр Мидхат Шагиахметов, Ареспублика Ҭаҭарсҭан ааглыхреи ахәаахәҭреи рминистр Олег Коробченко, Казань ақалақь ахада Ильсур Метшин, уҳәа убас егьырҭгьы.

Аԥснытәи аделегациа аусуратә ҭаара апрограма иалагалоуп Иаарту Акционертә Еилазаара «КАМАЗ» аҭаара, Иҷыдоу Аекономикатә Зона «Алабуга» аусура аилкаара, ақалақь Иннополис, атехнополис «Химград» рҭаара, уҳәа убас иҵегьы. 

Аԥсны аделегациа Ҭаҭарсҭан аҭаара жәабран 3 рзы ихыркәшахоит.