Аҟәа. Абҵарамза 16, 2022 шықәса. Аԥсныпресс. Апроект «Урыстәылеи Аԥсни реимадаратә акультуратә усмҩаԥгатәқәа» аҳәаақәа ирҭагӡаны, абҵарамза 17 рзы, С. Ҷанба ихьӡ зху Аԥснытәи аҳәынҭқарратә драматә театр аҿы, имҩаԥгахоит урыстәылазегьтәии жәларбжьаратәии аконкурсқәа рлауреат Дмитри Маслеев имастер-класс. Еицырдыруа апианист уи мҩаԥигоит А. Чичба ихьӡ зху Аҟәатәи аҳәынҭқарратә музыкатә ҵараиурҭа астудентцәеи амузыкатә школқәа рҵаҩцәеи рзы, ҳәа адырра ҟанаҵоит акультура Аминистрра апрес-маҵзура.
Абҵарамза 18, асааҭ 19:00 рзы, Р. Д. Гәымба ихьӡ зху Аԥснытәи аҳәынҭқарратә филармониа аҿы имҩаԥысуеит Дмитри Маслеев исолотә концерт,араҟа иарҳәахоит Л. Бетховен, П.И. Чаиковски, С.В. Рахманинов рырҿиамҭақәа.
Абҵарамза 19, асааҭ 19:00 рзы, Р.Д. Гәымба ихьӡ зху Аԥснытәи аҳәынҭқарратә филармониа аҿы имҩаԥысуеит Георги Гараниаин напхгара зиҭо Аџьаз-оркестр аконцерт, араҟа инагӡахоит аџьазтә стандартқәа, иара уба асовет аамҭазы еицырдыруаз акомпозиторцәа: Т. Хренников, Н. Богословски, А. Бабаджаниан, В. Соловиов-Седои, М. Блантер, Г. Гладков, уҳәа рырҿиамҭақәа.
Аҩналара хәыда-ԥсадоуп.
Апроект Урыстәылеи Аԥсни реимадаратә культуратә усмҩаԥгатәқәа» Урыстәылатәи Афедерациеи Аԥсны Аҳәынҭқарреи акультура аусхкы ала ирыбжьоу аимабзиаратә еизыҟазаашьақәа рырӷәӷәареи рыҿиареи иазырхоуп. Аусмҩаԥгатәқәа рымҩаԥгара адгылара арҭоит Урыстәылеи Аԥсни ркультура Аминистррақәа.
Аиҿкааҩ – УРЫСКОНЦЕРТ (РОСКОНЦЕРТ).
