Сухум. 24 октября 2025. Апсныпресс. Президент Бадра Гунба поздравил народного артиста Абхазии Кесоу Хагба с юбилеем.
__
«Ҳаҭыр зқәу Кьасоу Золотинск-иҧа! Гәык-ҧсыкала ишәыдысныҳәалоит шәиубилеи!
Шәара 50 шықәса инарзынаҧшуа аҧсуа милаҭтә театр амаҵ азура иазышәкит. Уи аамҭа иалагӡаны ҟазара ҳаракыла инашәыгӡеит ахәаҧшцәа рыбзиабара шәзаазгаз, ргәалашәараҿы инхаз арольқәа. Иара убас имаҷым қәҿиарала шәахьыхәмарыз акиносахьақәагьы.
Ирацәоуп шәџьабаа аҧсуа театр азы акадрқәа реиҵааӡара аус аҿы. Еснагь шәрызҿлымҳан аҟыбаҩ змоу аҿар, урҭ ацхыраара рышәҭон.
Аҟазара инаваргыланы еснагь шәалахәын ауаажәларра-политикатә ҧсҭазаара. Аҳәынҭқарреи ҳауаажәлари шәырзааҧсон еснагь, еиуеиҧшым аамҭақәа рзы шәыҟан Жәлар Реизара адупутатс, акультура аминистрс.
Иахьа уажәраанӡагьы ааҧсарак шәықәымкәан шәнапы алакыуп бзиа ишәбо, шәыҧсҭазаара ззышәкыз актиор изаанаҭ, ахәаҧшцәа шәыргәырӷьоит шәҟазара ала.
Акыр иаҧсоу Кьасоу Золотинск-иҧа, ишәзеиӷьысшьоит агәабзиара, ашықәсынҵыра рацәа, амилаҭ театр аӡыргараҿы ақәҿиара дуқәа. Наунагӡа ишәыцзааит ашықәсқәа ирылган иаашәго ахәаҧшцәа рыбзиабара.
Ҽааныбзиала шәнеиааит!»
