Аҟәа. Жәабранмза 20, 2024 шықәса. Аԥсныпресс. Зыԥшра ҟамҵакәа Бедиатәи аиашахаҵаратә уахәама аҿы имҩаԥысуа аиҭашьақәыргыларатә усурақәеи, иара убас иргылахараны иҟоу Амилаҭтә сахьатә галереиа ахыбра аескизтә проект ашьақәырӷәӷәара иадҳәалоу азҵаарақәеи ирылацәажәеит аҩаша, жәабранмза 20 рзы атәыла аԥыза-министр Алеқандр Анқәаб имҩаԥигаз аусуатә еилатәара.
Аилатәара рхы аладырхәит акультура аминистр инапынҵақәа назыгӡо Динара Смыр, аҭоурых-культуратә ҭынха ахьчаразы аҳәынҭқарратә Усбарҭа аиҳабы Гари Сангәлиа, Амилаҭтә сахьатә галереиа адиректор Сурам Сақаниа, Ареспубликатә Унитартә Наплакы «Аԥсныргылара» адиректор Хада Руслан Тәанба, Аҟәа ақалақь архитектор хада Давид Ешба, аргылара-нардкыларатә еиҿкаара анапхгаҩы Русҭам Цәеиба.
Аминистрцәа Реилазаара апресс-маҵзура иҟанаҵо адыррақәа рыла, аилатәара иалахәыз Бедиатәи аныхабаа аҟәырӷ аиҭашьақәыргылара иадҳәалоу азҵаарақәа ирылацәажәеит. Аҳәынҭқарратә Усбарҭа анапхгаҩы Гарри Сангәылиа иҟаиҵаз адыррақәа рыла, урыстәылатәи аспециалистцәа аныхабаа ахыб зку аиужьратә конструкциа аиҭакразы аԥсуа ган зыдгалара мҩаԥнагаз авариантқәа рганахьала ргәаанагарақәа рҳәеит. Урҭ иҿыцу, технологиала иуадаҩу, идуу ахаҳәтә ҟәырӷ ашьақәыргылара, иара акульттә обиект ахаҭа иахьатәи аҭагылазаашьа ҳасаб азуны уахәаԥшуазар, инегативтәу ахҟьаԥҟьақәа азцәырнагар алшоит ҳәа иазгәарҭоит.
Аҭоурых-культуратә ҭынха ахьчара азы Аԥыза-министр ицәырҵыз азҵаара аӡбара азы еиуеиԥшым азнеишьақәа ҳасаб азуны адинмаҵзуҩцәа аҭоурых-культуратә ҭынха ахьчара азы Аҳәынҭқарратә Усбарҭеи аргылаҩцәеи дареи еилацәажәаны еиқәшаҳаҭны аконсенсус аԥшаара алдыршарц азы ажәалагала ҟаиҵеит.
Аилатәара иалахәыз, Аҟәа ақалақь Пушкин имҩала игылоу Амилаҭтә сахьатә галереиа ахыбра аргыларазы 2013 шықәсазы атәыла анапхгара аҿаҵа ала иҟаҵаз аескизтә проект иалацәажәеит. Зҽеиҭазкыз аҭагылазаашьақәа инарымаданы, Алеқсандр Анқәаб агалериа анапхгараҭареи аҭоурых-культуратә ҭынха ахьчаразы Аусбарҭеи аескиз акоректировка азы разгәаҭарақәа ҳасаб азуны аихшьаалатә проект ашьақәырӷәӷәара алыршаразы анапынҵақәа ҟаиҵеит. Уи иазԥхьагәанаҭалароуп иҟоу аҭоурых-культуратә ҭынха аобиекти ҳаамҭазтәи ахыбреи рархитектуратә еишьашәалара.
«Хадара злоу акакәны иҟоуп иқәыргылоу ахықәкқәа ирықәшәо архитектуратә ӡбамҭақәа рыԥшаара», – ҳәа инаҵшьны иазгәеиҭеит атәыла аԥыза-министр Алеқсандр Анқәаб. Убри аан, аргыларатә плошьадка апериметр алкаара азы иахәҭоу аҳәааркра ашьақәыргылара азы анапынҵақәа ҟаҵан.
