Ихадоу атурнир аҿы сынтәа, иҳаҩсыз ашықәс азы еиԥш рхы аладырхәит 60-ҩык ашахматистцәа, урҭ рхыԥхьаӡараҿы иҟан х-ҩык агроссмеистерцәагьы. Зынӡа Тамшь ақыҭан имҩаԥысуаз атурнир ахь иааит  160-ҩык Аԥсни Урыстәылеи рҟынтәи ашахматистцәа.  

Атурнир Аԥхьахәтә фонд сынтәа 200 нызықь мааҭ рыла еиҳахеит, уи  800 нызықь мааҭ рҟынӡа инаӡеит. Атурнир аҿы аиааира згаз 150 нызықь мааҭ иоуит, аҩбатәи аҭыԥ згаз - 100 нызықь мааҭ, ахԥатәи аҭыԥ згаз - 70 нызықь  мааҭ.

Атурнир иалахәыз иранашьахеит Аԥсны Афырхацәа Заза, Аслан, Даури Сҭеԥани Занҭариаа рыхьӡала аҳамҭақәа.  Аҳамҭақәа роуит зегьы реиҳа аперспектива злоу ашахматистцәа ҳәа иалкаахаз Сарида Лакәатааԥҳаи аиҳабацәа рыбжьара 2023 шықәсазы ачемпион Нестор Багаҭелиеи. Аҳамҭа аиуразы Нестор Багаҭелиа иабду, аветеранцәа рыбжьара асамбо азы ҩынтәны адунеи ачемпион Борис Багаҭелиа дицны днеит. Уи атурнир алахәылацәеи асасцәеи ашәа рзиҳәеит. Иара убас атурнир алахәылацәа рзы иқәгылеит Очамчыра ақалақь аҟынтәи адоль асыҩ ҿарацәа.

Аԥсны ашахматқәа Рфедерациа апрезидент Константин Ҭыжәба атурнир аԥҵара инаркны атурнир ахь иаауа Урыстәылатәи агроссмеистерцәа иҭабуп ҳәа реиҳәеит. Иара убасгьы иазгәеиҭеит, акемпинг «Тамшь-Village» аколлектив аицлабрақәа рымҩаԥгаразы акыр иманшәалаз аҭагылазаашьақәа шаԥырҵаз.  Атурнир иалахәыз ирыдныҳәалеит аҵара аминистр Инал Габлиа, аҿари аспорти русқәа рзы аҳәынҭқарратә Еилакы ахантәаҩы Ҭарашь Ҳагба, Амилаҭтә олимпиатә Комитет апрезидент Валери Аршба. Иара еизаз, Асовет Еидгыла аамҭазы Аԥсны 46 спорттә хкы аҿиара ишаҿыз, 6-ҩык Аԥснытәи аспортсменцәа Асовет Еидгыла еизгоу акоманда аилазаараҿы аолимпиатә чемпионцәаны ишыҟалахьаз ргәалаиршәеит.

Ашахматтә фестиваль Аԥсны аҿари аспорти русқәа рзы Аҳәынҭқарратә Еилакы адгыларала иҩаԥысит.