Аҟәа. Жәабранмза 16, 2024 шықәса. Аԥсныпресс. Аҳәынҭқарра Ахада Аслан Бжьаниа аҳаҭыртә хьӡқәа ранашьара азы Аусԥҟақәа инапы рыҵаиҩит.
Аҳәынҭқарра Ахада Иусԥҟала «Аԥсны Аҳәынҭқарра зҽаԥсазтәыз ажурналист» ҳәа аҳаҭыртә хьӡы ихҵоуп Кәарҷиа В. А.
Ахада Кәарҷиа Валери Андреи-иԥа «Аԥсны Аҳәынҭқарра зҽаԥсазтәыз ажурналист» ҳәа аҳаҭыртә хьӡы ихиҵеит.
«Ажурналистика аус аҟны илшамҭақәеи шықәсарацәалатәи лыҵшәа змоу иусуреи рзы «Аԥсны Аҳәынҭқарра зҽаԥсазтәыз ажурналист» ҳәа аҳаҭыртә хьӡы ихҵазааит Кәарҷиа Валери Андреи-иԥа, Аԥсны Ажурналистцәа реидгыла алахәыла, Аҟәатәи Иаарту аинститут аректор», - ҳәа иаҳәоит Аусԥҟа.
Адокумент иаҵаҩуп 2024 шықәса жәабранмза 16 рзы.
Аслан Бжьаниа Иусԥҟала аестрадатә ҟазара арҿиараҟны ллагаламҭеи анагӡаратә ҟазара ҳараки рзы Хьыбла Леонид-иԥҳа Мықәԥҳа «Аԥсны Аҳәынҭқарра зҽаԥсазтәыз артист» хәа аҳаҭыртә хьӡы лыхҵоуп.
Аусԥҟа иаҵаҩуп 2024 шықәса жәабранмза 15 рзы.
Аҳәынҭқара Ахада Иусԥҟала Сулҭан Ҳажираҟәа «Аԥсны Аҳәынҭқарра зҽаԥсазтәыз артист» ҳәа аҳаҭыртә хьӡы ихҵоуп.
«Кавказ ажәларқәа рестрадатә ҟазара арҿиареи ркультура аларҵәареи рзы» «Аԥсны Аҳәынҭқарра зҽаԥсазтәыз артист» ҳәа аҳаҭыртә хьӡы ихҵазааит Сулҭан Борис-иԥа Ҳажираҟәа», - ҳәа иаҳәоит Аҳәынҭқарра Ахада Иусԥҟа.
Адокумент иаҵаҩуп жәабранмза 16, 2024 шықәса рзы.
