Аҟәа. Ажьырныҳәамза 17, 2024 шықәса. Аԥсныпресс. Амилаҭтә еилазаара «Гарант-страхование» аҿы Аԥсны автоԥгаԥса ҟамҵаӡакәа урыстәылатәи аномерқәа змоу амашьынақәа рыла ареспубликаҟа иаауа рзы ахараԥса ашьҭыхразы ажәалагала ҟарҵоит.
«Ахараԥса уажәы иҟоу фышә мааҭ рҟынтәи 5 нызықь мааҭ рҟынӡа ашьҭыхра хымԥадатәиуп», - ҳәа «РИА Новости» акорреспондент диҿцәажәо иазгәеиҭеит аилазаара адиректор ихаҭыԥуаҩ Ахра Кецба.
Аԥсны автоԥгаԥса азы азакәан рыдыркылеит 2006 шықәсазы, аха уи анагӡарахь 16 шықәса рышьҭахь ауп ианыиас.
Ахра Кецба иажәақәа рыла, иахьа иҟоу ахараԥса ахышәа-ҵышәа автомашьынарныҟәцаҩцәа рмашьынақәа ареспублика аҿы аԥгаԥса аҟаҵаразы астимул рынаҭаӡом.
«Аԥгаԥса аҟамзааразы ахараԥса уажәы иҟоу 600 мааҭ акәымкәа 4-5 нызықь мааҭ рҟынӡа инаӡозароуп. Ари аицҵалыҵ аԥгаԥса аахәаразы астимул рынаҭоит автомашьынарныҟәцаҩцәа. Автомашьынарныҟәцаҩ иаҳҳәап амҩа-транспорттә машәыртә хҭыс дықәшәазар, усҟан ахараԥса даҽа зықь мааҭ, мамзаргьы зқьы хәышә мааҭ ацлозароуп» , – ҳәа иҳәеит Ахра Кецба.
2023 шықәсазы аилазаара «Гарант-страхование» 90 нызықь инарзынаԥшуа урыстәылатәи аномерқәа змоу амашьынақәа рыԥгаԥсара мҩаԥнагеит, урҭ рахьынтә 9,5 нызықь - онлаин-режим ала. Уи 2022 шықәсазы аасҭа ҩынтә еиҳауп, ҳәа инаҵшьны иазгәеиҭеит аилазаара адиректор ихаҭыԥуаҩ.
«Урыстәыла атәылауаа аԥгаԥса аҟаҵара шхымпадатәәиу азы адырра рымазаара азҳауеит, насгьы уи ареспублика ахь уалалаанӡа онлаин-режим ала аҟаҵаразы алшара ахьроуз аус акыр иарманшәалоит» , - ҳәа иҳәеит Ахра Кецба.
Аилазаара адыррақәа рыла, 2023 шықәсазы имҩаԥгаз урыстәылатәи аномерқәа змоу амашьынақәа рыԥгаԥсара аицҵалыҵ 95 миллион мааҭ рҟынӡа инаӡоит.
Уажәы Аԥсны аус руеит аҳәаанырцәтәи атәылауаа равтомашьынақәа рыԥгаԥсара мҩаԥызго аҳәынҭқарра-хазхаҭалатәи аилазаарақәа ԥшба. 15-мшы рзы аԥгаԥсара ахәԥса зықьмааҭ рҟынӡа инаӡоит, мызкы азы - 1,5 нызықь мааҭ.
