Ақалақь аҿы аԥсыӡфҩы агара инамаданы, аекологиа азы аҳәынҭқарратә Еилакы ахантәаҩы иажәақәа рыла, уи аԥсыӡ аус адуларатә зауад аҟынтәи аԥша иаанагоит.

«Шәара еилышәкаауазар акәхап, араҟа аус здыруало аԥсыӡ 1 - 2 кьыла ишыҟам, уи акапан акырынтә еиҳауп.  Убри ауп афҩы бааԥс зхылҵуа. Аусдулараан аԥсыӡ арыцқьара иахысуеит. Убри аан рыцҳарас иҟалаз, афильтрқәа ироуа ақәыӷәӷәара  мыцхәы ианырацәахәо  ыҟоуп, уи иахҟьаны дара русура еиԥҟьоит. Аха иазгәаҭатәуп, убри аан изеиԥшразаалак ишҳаму акомпонент ҳәа акгьы аҳауа иалалаӡом», - ҳәа иҳәеит Савели Ҷыҭанаа.

Иара убасҵәҟьа иара  адырра ҟаиҵеит иахьа аекологиа азы аҳәынҭқарратә Еилакы аинспекторцәа аҳәынҭқарратә шәарҭадара Амаҵзура аусзуҩцәа рыцны аҟәатәи аԥсыӡ аусдуларатә зауадқәа хԥа рҿы ареидтә усмҩаԥгатәқәа шымҩаԥыргаз.  Изеиԥшразаалак хра злам, ауаҩы игәабзиара ашәарҭара иҭазыргыло акомпонентқәа аҳауа алаҵара иадҳәалоу афактқәа аарԥшӡамызт.  

Савели Ҷыҭанаа игәалаиршәеит иҳаҩсыз ашықәс азы аԥсыӡкра аамҭахәҭа  зынӡа иԥсыҽны ишымҩаԥысыз атәы.

«Ҵыԥх аԥсыӡкра аамҭа еиԥҟьеит, сынтәа ибзианы имҩаԥысуеит, аԥсыӡ маҷымкәа ицәырҵит. Иазгәасҭарц сҭахуп, иркуа ақамшьиа хышықәса зхыҵуа ауп. Уи умкыр, ԥшьышықәса анахыҵлак иара ԥсуеит. Аԥснытәи аӡымҽхак аҿы аԥсыӡкра ишьақәырӷәӷәоу аквотақәа инақәыршәаны имҩаԥысуеит», - ҳәа инаҵшьны иазгәеиҭеит Аԥсны аекологиа азы аҳәынҭқарратә Еилакы ахантәаҩы.

Уи иара убас аҵыхәтәантәи аамҭазы ақамшьиа акушәа зыхә дуу аԥсыӡхкқәа ркуеит ҳәа иҟоу ацәажәарақәа ииашаӡам ҳәа иазгәеиҭеит.