Аҟәа. Ажьырныҳәамза 9, 2024 шықәса. Аԥсныпресс. Изакәанымкәа анаркотикатә маҭәашьарқәа рыдгалара азы ахара рыдҵоуп хҩык Аԥсны ауааԥсыра.
Аоператив-ԥшааратә усмҩаԥгатәқәа рымҩаԥгараан аҳҭнықалақь аҩныҵҟатәи аусқәа Русбарҭа ашьаусԥшааратә ҟәша аусзуҩцәа дааныркылеит 2000 шықәсазы ииз Сыҷынаа Алиас Феликс-иԥа. Абри атәы аанацҳауеит ареспублика аҩныҵҟатәи аусқәа Рминистрра апресс-маҵзура.
Сыҷынаа Алиас имхыз амедицинатә шприц иҭаз агәырлаҵаратә еилаҭәа, имҩаԥгаз аекспертиза инақәыршәаны, «метадон» ҳәа изышьҭоу анаркотикатә маҭәашьар ауп. Анаҩс аҭира хықәкыс иҟамҵаӡакәа изакәанымкәа анаркотикатә маҭәашьар аахәареи адгалареи аиагареи рзы, Сыҷынаа Алиас Феликс-иԥа иганахьала ашьаусеилыргара хацыркуп. Сыҷынаа Алиас ахьырхәра аҳасабала аҭыԥ дшахымҵуа азы ашәҟәы инапы аҵарҩуп.
Гагра ақалақь аҿы Араион аҩныҵҟатәи аусқәа Русбарҭа ашьаусԥшаара аҟәша аусзуҩцәа Гәылрыԥшь араион аҿы инхо, 1983 шықәсазы ииз Каарес Роберт Виктор-иԥа анаркотикатә маҭәашьар идырбалеит.
Роберт Каарес идырбалеит амедицинатә шприцқәа ҩба ирҭаз, «мефедрон» ҳәа изышьҭоу анаркотикатә маҭәашьар.
Анаҩс аҭира хықәкыс иҟамҵаӡакәа изакәанымкәа анаркотикатә маҭәашьар аахәареи адгалареи аиагареи рзы Роберт Каарес иганахьала ашьаусеилыргара хацыркуп. Уи аҭыԥ дшахымҵуа азы ашәҟәы инапы аҵарҩуп.
Анаҩс аҭира хықәкыс иҟамҵакәа изакәанымкәа анаркотикқәа раахәара, рыҵәахра, рымҩангара азы дыгәҩарахеит 1985 шықәса рзы ииз Гагра араион Лӡаа ақыҭа анхаҩы Даур Анҭелаа. Иара идырбалеит амаҭәашьар зҭаз агәыри аххыраԥшра змоу амаҭәашьар згәылаз аилаҳәареи. Урҭ зегьы анаркотикатә маҭәашьарқәа ракәын.
Анҭелаа Даур хаҭала игәаҭараан идырбалеит иагьимырхит ахархәаразы ирхиаз, амедицинатә шприц иҭаз агәырлаҵаратә маҭәашьар, иара убас аххыраԥшра змоу амаҭәашьар згәылаз аилаҳәареи. Аекспертцәа ишышьақәдыргылаз ала, иарбоу амаҭәашьарқәа «метадон» ҳәа изышьҭоу анаркотикқәа роуп.
Арперативтә усмҩаԥгатәқәа мҩаԥыгеит Гагра араион аҩныҵҟатәи аусқәа Русбарҭа Бзыԥтәи амилициа ашьаусԥшааратә ҟәша аоперативтә еилазаара аусзуҩцәа.
