Аҟәа. Ажьырныҳәамза 9, 2024 шықәса. Аԥсныпресс. Цандрыԥшьтәи акоманда «Саӡаа» ашьапылампыласыҩ қәыԥшцәа ажьырныҳәамза 6 – 8 рзы афедералтә ҵакыра «Сириус» аҿы имҩаԥысуаз атурнир «Қырсаныҳәазтәи Ахраҿа» аԥхьахәқәа ргеит, ҳәа адырра ҟанаҵоит атәыла аҿари аспорти русқәа рзы аҳәынҭқарратә Еилакы апресс-маҵзура.
2013 шықәсазы ииз ашьапылампыласыҩцәа атурнир аҿы аиааира ргеит. Атурнир иреиӷьу ахәмарҩы ҳәа далкаахеит Баграт Ҭарба, иреиӷьу ажәылаҩ ҳәа – Леон Хастиан.
Акоманда азыҟарҵоит Гәырам Ԥкьыни Ара Казариани.
2012 шықәсазы ииз ашьапылампыласыҩцәа ркоманда араӡны медалқәа ранашьахеит.
Акоманда иреиӷьу ахәмарҩы ҳәа далкаахеит Рамиль Ҳашыг, атурнир иреиӷьу амбахьчаҩыс дыԥхьаӡоуп Владимир Асатуриан, атурнир иреиӷьу ахәмарҩыс – Едуард Папазиан.
Акоманда азыҟаиҵоит Ашот Маркариан.
2017 шықәсазы ииз ашьапылампыласыҩцәа ркоманда убасҵәҟьа араӡны медалқәа ранашьахеит. Акоманда иреиӷьу ахәмарҩы ҳәа далкаахеит Искандер Аршба. Акоманда азыҟаҵаҩцәа – Гәырам Ԥкьыни Ара Казариани.
