«Урҭи ҳареи акыр аамҭа ҵуеит аусеицура ҳабжьеижьҭеи, араионқәа рҿы алитературатә семинарқәа мҩаԥаагоит. Анаҩс атәыла зегьы иахьаҵанакуа имҩаԥаагараны ҳаҟоуп алитературатә семинар. Асеминар аусура рхы аладырхәуеит  50-ҩык инареиҳаны авторцәа.  Уи – аиҳарак абжьаратәи ашколқәа абжьаратәии аиҳабыратәи аклассқәа рҵаҩцәа роуп», –  ҳәа иҳәеит иара.

Вахтанг Абхазоу ашәҟәыҩҩы ҿарацәа аус рыцура атәы далацәажәеит. Уи азы ҷыдала акомиссиа аԥҵан. Акомиссиа иреиӷьу алитературатә рҿиамҭақәа алнахуеит, урҭ анаҩс ажурналқәа «Амцабз», «Алашара», агазеҭ «Аамҭа»,иара убас аизга  «Ашацкыра» рҿы икьыԥхьхоит.

«Ари зегьы ҿыц арҿиарамҩа ианыло ақәыԥшцәа рзы истимул бзианы иҟалоит», – ҳәа иажәа иациҵеит иара.

Уи иажәақәа рыла, уажәы ҳтәыла аҿы 30-ҩык  рҟынтәи 40-ҩык рҟынӡа алитератор қәыԥшцәа ыҟоуп.   Аиҳабацәа рабиԥара акәзар, рыцҳарас иҟалаз, аҵыхәтәантәи хәы-шықәса рыла имаҷымкәа ашҟәыҩҩцәа рдунеи рыԥсахит.

«Ари ҳара ҳлитература азы даара цәыӡ дууп», –  ҳәа иҳәеит Вахтанг Абхазоу.

Аԥсны ашәҟәыҩҩцәа Реидгыла ахантәаҩы напхгара зиҭо аиҿкаара алалара шыҟало атәы еиҭеиҳәеит:

«Ҳара  ҳҿы еиҿкаауп ашәҟәыҩҩцәа Реидгылара алалара азы абжьгаратә комиссиа. Уи ахантәаҩы уахь дналаҵаны быжьҩык алахәылацәа рыла ишьақәгылоуп. Аидгыла алаларазы арзаҳалқәа анаауа, акомиссиа урҭ ахшыҩзышьҭра аҭаны иҭнаҵаауеит, анаҩс аӡбамҭа апрезидиум аилатәара аҿы ирыларҳәоит.  Ҳара ахыԥхьаӡара мацара ҳашьҭаӡам, ҳара ҳзы акырӡа аҵанакуеит ахаҭабзиара.  Абжьааԥны, хәҩык-фҩык рҟынтәи иалаҳкаауеит ҩыџьа-хҩык. Анаҩстәи аетап  аҿы имаӡоу абжьыҭира мҩаԥысуеит. Иҟалоит раԥхьа изымцаз даҽазнык рылшара анԥыршәогьы».

Вахтанг Абхазоу ашәҟәыҩҩцәа Реидгыла аусураҿы ауадаҩрақәагьы шцәырҵуа азгәеиҭеит.

«Раԥхьаӡа иргыланы, уи аусзуҩцәа ироуа имаҷу ауалафахәы ауп, анаҩс ахатәы хыбра амамзаара», – ҳәа инаҵшьны иазгәеиҭеит иара.

Аԥсны ашәҟәыҩҩцәа Реидгылаҿы иҟоу аихьӡарақәа дрылацәажәеит. «Аиҿкаара ала иалхыз ашәҟәқәа аквота ала иҭыжьхоит. Уи аҳәынҭқарра алитература аҭыжьра адгылара анаҭоит ҳәа ауп иаанаго. Уи даара акыр аҵанакуеит, аиҳарак асахьаркыратә литературеи ашәҟәыҩҩ ҿарацәеи, иара убас атәыла аҿы адоуҳатә ԥсҭазаареи  рыҿиара азы».