Аҟәа. Ажьырныҳәамза 4, 2023 шықәса. Аԥсныпресс. Амилициа аусзуҩцәа Аҟәа ақалақь, Афырхацәа аҳәаахьчаҩцәа рымҩала аоператив-ԥшааратә усмҩаԥгатәқәа рымҩаԥгараан дааныркылеит 1976 шықәсазы ииз Адлеиба Леонид Гарри-иԥа. Хаҭала игәаҭараан ахаҵа идырбалеит еихша-еихшаны аҭиразы ирхиаз аилаҳәарақәа ирҭаз анаркотикатә маҭәашьарқәа. Иаанкылаз ишеиҭеиҳәаз ала, аилаҳәарақәа иргәылаҳәан «метадон» ҳәа изышьҭоу анаркотикатә маҭәашьар, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.
Леонид Адлеиба иажәақәа рыла, иара иарбоу анаркотикатә маҭәашьар згәылаҳәаз аилаҳәара анаҩс аҭира хықәкыс иҟаҵаны имаӡоу аҭыԥ аҟынтәи игеит. Иарбоу анаркотикатә маҭәашьар аҭира аҟынтәи ахашәалахәы аиура аҭыԥи аҭагылазаашьеи иара иирбеит амессенџьер Telegram аҿы аник «Дони» ала иҟоу аконтакт. Уи иҿы Адлеиба Леонид уаанӡагьы ихазы анаркотикқәа ааихәахьан.
Анаркотикатә маҭәашьар хазы-хазы еихшаны аилаҳәарақәа ирылаҳәаны, Леонид Адлеиба урҭ ргеолокациа арбарала зфотосахьақәа ҭихуаз имаӡоу аҵәахырҭақәа рҿы ашьҭаҵарала рыҭира далагеит. Иарбоу аус азы иара еилаҳәарак азы 1000 мааҭ иоуан.
Афырхацәа аҳәаахьчаҩцәа рымҩала аԥшааратә усмҩаԥгатәқәа рымҩаԥгараан амилициа аусзуҩцәа ирыԥшааит иагьцәырыргеит аметадон згәылаз апалиетелен еиқәаҵәа иалхыз аилаҳәарақәа ԥшьба.
Леонид Адлеиба имхыз, иара убас «имаӡоу аҵәахырҭақәа» рҟынтәи иаагаз аметадон азеиԥш капан 7 грамм рҟынӡа инаӡоит, уи ҷыдала идуу акапан ахь иаҵанакуеит.
Анаҩс аҭира хықәкыс иҟаҵаны, ҷыдала зыкапан рацәоу анаркотикатә маҭәашьар изакәанымкәа адгалареи, аҵәахреи аигареи ирыдҳәалоу афакт ала, Аԥсны Аҳәынҭқарра Ашьаустә Закәанеидкыла ахәҭаҷ 224 ахәҭа 3 ап. «в» инақәыршәаны, Адлеиба Леонид Гарри-иԥа иганахьала ашьаусеилыргара хацыркуп.
Леонид Адлеиба дҭаркит. Ашьаусеилыргара мҩаԥнагоит Аҟәа ақалақь аҩныҵҟатәи аусқәа Русбарҭа аусеилыргара аҟәша.
