Аҟәа. Ажьырныҳәамза 4, 2023 шықәса. Аԥсныпресс. Софииа Олеиник лыӡра инамаданы аҳҭнықалақь аҩныҵҟатәи аусқәа Русбарҭа ашьаусԥшааранӡатәи аҟәша агәаҭара мҩаԥнагоит, ҳәа адырра ҟанаҵоит атәыла аҩныҵҟатәи аусқәа Рминистрра.
Аҟәа ақалақь аҿы инхо 1995 шықәсазы ииз Олеиник Софииа Валери-иԥҳа лыԥшаара иаҿуп
Аҭыԥҳа дызбахьоу, мамзаргьы уи дыхьыҟоу аҭыԥ азы џьара дыррак змоу зегьы рахь аҳәара ҟаҵоуп уи азы адырра ҟарҵарц ирзааигәоу амилициа аҟәша ахь аҭел 002 ала, мамзаргьы аҩныҵҟатәи аусқәа Рминистрра агәаргаратә ацәаҳәа аҭел +7 940 925-20-95 (WhatsApp, Telegram) ала.
Аҭыԥҳа дыӡит ҳәа аҳәамҭа ҟалҵеит лара лан. Иазгәаҭоуп, аԥҳәызба ԥхынҷкәын 27 асааҭ 17:00 рзеиԥш Назаӡе лымҩаҿы иҟоу лыҩны дышдәылҵыз, иахьа уажәраанӡагьы лыхабар шыҟам. Софииа Олеиник илшәын аџьынс еиқәаҵәеи акурткеи, илыман асумка.
Амилициа Аҟәа инхо аҭыԥҳа Софиа Олеиник дахьыҟоу аилкааразы аоператив-ԥшааратә уснагӡатәқәа мҩаԥнагоит.
