Аҟәа. Ԥхынҷкәынмза 28, 2023 шықәса. Аԥсныпресс. Урыстәыла иҿыцу арегионқәа рҿы Аԥсны Аҳәынҭқарра Ахада Иҷыдоу ихаҭарнак, Аԥсны иҷыдоу аҭагылазаашьақәа рминистр Лев Кәыҵниа иусуратә визит хыркәшахеит.
Аҭаара аҳәаақәа ирҭагӡаны Лугансктәи Жәлартә Республикеи Донецктәи Жәлартә Республикеи рнапхгарақәа рхадацәа рԥыларақәа мҩаԥысит. Лев Кәыҵниа иара убас дырԥылеит Херсонтәии Запорожтәии аобластқәа рхадацәа Андреи Алексеенкои Антони Кольцови.
Аганқәа арегионалтә ҩаӡара аҿы аусеицура азҵаарақәа ирылацәажәеит. Иалацәажәеит иара убас Урыстәылатәи Афедерациа иҿыцу арегионқәа рҿы инхо, иара убас иҷыдоу арратә операциа иалаху аԥснытәи аџьынџьуаа рганахьала аинформациа ала аимадара. Иазааҭгылеит иара убас Аԥсни Урыстәылатәи Афедерациа иҿыцу асубиектқәеи рыбжьара агуманитартә еицхыраареи аекономикатә усеицуреи ирыдҳәалоу азҵаарақәа.
