Аҟәа. Ԥхынҷкәынмза 20, 2023 шықәса. Аԥсныпресс. Аҳәынҭқарра Ахада Аслан Бжьаниа Аԥсны аҳәынҭқарратә шәарҭадара Амаҵзура аусзуҩцәеи аветеранцәеи рзанааҭтә ныҳәа рыдиныҳәалеит, ҳәа адырра ҟанаҵоит Аҳәынҭқарра Ахада ипресс-маҵзура.
Аҳәынҭқарра Ахада аҳәынҭқарратә шәарҭадара аусбарҭақәа Рмаҵзура аусзуҩ иусура ҳаҭыр амоуп, аха убри аан еснагьгьы ашәарҭара ацуп, ари иуадаҩу азанааҭ ҷыдала азыҟаҵара, ахамеигӡара, агәымшәара аҭахуп ҳәа инаҵшьны иҳәеит. «Аԥсны Аҳәынҭқарра аҳәынҭқарратә шәарҭадара аусбарҭақәа русзуҩцәа ахаангьы иҳараку рыпрофессионализм аадырԥшуан ҳтәыла амилаҭтә шәарҭадара, асуверенитет ахьчара иадҳәаланы хьӡи-ԥшеи рыла инарыгӡоз руснагӡатәқәа рыҟны. Шәара шәусура улаԥш иҵашәо иҟаӡам. Аха есҽнытәи шәусура ҳҳәынҭқарра ашәарҭадара аиқәырхара иазкуп»,- ҳәа иаҳәоит адныҳәалараҿы.
Иахьа аҩныҵҟатәи еиԥш адәныҟатәи ашәарҭарақәа ирҿагылоуп. Убри инамаданы иҷыдоу амаҵзура аусбарҭақәа рхыдҵақәа рынагӡараан аоперативла урҭ аҭак аҟаҵара рыхәҭоуп. Аҳәынҭқарра Ахада ихьыԥшым аԥсуа ҳәынҭқарра ақәгара иашьҭоу амчқәа шыҟоу иҳәеит. «Ҳҳәынҭқарреи ҳетноси реиқәырхара азы шәара иҟоу аметодқәа зегьы рыла иҟоу ашәарҭарақәа рҿагылара шәылшәыршароуп. Ҳҳәынҭқарра ҳзеиқәҳмырхар – ҳетногьы ҟалаӡом», - ҳәа аҳәынҭқарра аҿы имҩаԥысуа апроцеқәа рзы ауаажәларра аинформациа рыҭара иаҵоу аҵакы ахадара азгәаҭо иҳәеит Аҳәынҭқарра Ахада.
«Икылкааны ихадоу азҵаарақәа рыла аԥырхагахара иашьҭоуп – хаҭала сара сгәаанагарала аиҳарак ишәарҭоу Урыстәылатәи Афедерациеи Аԥсны Аҳәынҭқарреи реизыҟазаашьақәа рыҿиара аԥырхагахара. Ҳара ҭоурыхла ҳхатәы ҩны аҿы анхареи аизҳазыӷьареи рзы алшара ҳауит. Ҳара иҳамоуп ари аҩны аргылара аҿы адгылара ҳазҭо аҩызцәа. Ҳара ҳаицхырааны ари аҩны ҳаргылароуп, уи азы гәаартыла ҳаизыҟазароуп», - ҳәа иазгәеиҭеит Аҳәынҭқарра Ахада.
Аслан Бжьаниа аҳәынҭқарратә шәарҭадара Амаҵзура ахыдҵақәа зегьы рынагӡара шалшо азы агәра шиго азгәеиҭеит, Аҳәынҭқарратә шәарҭадара Амаҵзура хаҭалатәи аилазаара зегьы ирзеиӷьеишьеит агәабзиара, анасыԥ, аԥсуа жәлар ринтересқәа рыхьчара иазкны рнапы злаку аусқәа рыҟны аихьӡарақәа.
Аҳәынҭқарратә шәарҭадара Амаҵзура ахантәаҩы Ҭемыр Ахьиба, ахәҭакахьала, атәыла анапхгара аоперативтә еилазаара ганрацәала ианаҭо ацхыраареи аусура ахәшьара ҳараки рзы иҭабуп иҳәеит.
Аусмҩаԥгатә ахыркәшамҭаз Аҳәынҭқарра Ахада иҭижьыз Аусԥҟақәа ирыԥхьеит. Урҭ инарықәрыршәаны, Аҳәынҭқарратә шәарҭадара Амаҵзура аусзуҩцәа Т. Арӡынбеи Р. Чакәитаӡеи «аполковник» ҳәа арратә хьӡы ранашьахеит, иара убас Аҳәынҭқарратә шәарҭадара Амаҵзура Ахантәаҩы ихаҭыԥуаҩыс дҟаҵоуп амаиор Дмитри Кәычбериа.
