Зегьы реиҳа Ашықәс Ҿыц иатәу асалатны иԥхьаӡоуп «Оливье». Аклассикатә рецепт ала уи иалалоит акартош  – 40 – 60 мааҭ кьылак азы, аҷых  - 70 мааҭ кьылак азы, анаша –250 – 330 мааҭ кьылак азы, аџьымшьы  – 100 мааҭк кьылак азы,  апетрушка – 15 мааҭ ҿаҳәарак азы, амаионез  - 220 мааҭ, кьылак акәтыжь – 380 мааҭ, знызынла акәтыжь амыцхәрас иарҭоит  аҭубар, мамзаргьы асоиска, урҭ зыхәԥса ҳаракым, кьылак азы 250 мааҭ ҳәа иааухәар ҟалоит.  

Аԥсныпресс акорреспондент иқәгылоу аҭиҩцәа Ашықәс Ҿыц аламҭалазы аџьармыкьа аҿы ахәқәа рышьҭыҵра зыхҟьои ҳәа  дразҵааит.

Акәац зҭиуа Михаил макьаназы акәац аахәаҩцәа маҷуп ҳәа иҳәеит.

«Ауаа ԥыхьеиԥш алшарақәа рымаӡам. Аӡәырҩы уажәы рхатәы проблемақәа рымоуп. Ҵыхәаԥҵәара змам ҳчарақәа, ҳкомпаниақәа, зегьы ишәымдыруеи, иааҳауа аԥарақәа зегьы уи иагоит», - ҳәа еиҭеиҳәеит иара.

Аахәаҩцәа руаӡәы илҳәеит лара шықәсык аҩныҵҟа ахәқәа рышьҭыҵра дшашьцылахьоу.

«Аныҳәа аҟынӡа ҩымчыбжь шыбжьоу ахәқәа ӷәӷәала ирызҳаӡом. Иазҳаргьы, уи ҳара ҳапроблема ауп. Ҳара ҳашьцылахьеит, шьҭа иџьаҳшьо ҳәа акгьы ыҟам. Иахьа ахәԥса акуп, уаҵәы уԥшыр зынӡа даҽакуп», – ҳәа лгәаанагара лҳәеит Кәтолынтәи Алиса.

Ашәырқәа зҭиуа Рита ахәқәа аарыхра акыр иадҳәалоуп ҳәа иазгәалҭеит.

«Сынтәа ахәырма даара имаҷын, иҳаҩсыз ашықс иаҿырԥшны уахаԥшуазар. Убри аҟнытә уи ахә иахьа иҳаракуп – кьылак 400 мааҭ иркуеит. Аԥхынра ахәырмарҩа ахә 1000 мааҭ рҟынӡа ихалар ауеит. Лара иара убас иацылҵеит: «Амандаринақәагьы сынтәа рыхәԥса ҳаракуп, кьылак 100 мааҭк иркуеит», -ҳәа илҳәеит лара.

Аҭиҩцәа аӡәырҩы ахәқәа уаҳа иазҳаӡом ҳәа иазгәарҭеит. Аныҳәа мышқәак шыбжьоу хымԥада уи ахьынӡаиашоу гәаҳҭоит Ҽааныбзиала шәнеиааит, ҳаҭыр зқәу ҳаԥхьаҩцәа!.