Аҟәа. Ԥхынҷкәынмза 18, 2023 шықәса. Аԥсныпресс. Имҩаԥысит аҩныҵҟатәи аусқәа рминистр Роберт Киут Краснодарҟа иусуратә ҭаара. Аҭаара аҳәаақәа ирҭагӡаны, аҩныҵҟатәи аусқәа рминистр аҵараиурҭа анапхгараҭара ахаҭарнакцәеи Аԥснынтәи уаҟа аҵара зҵо акурсантцәеи дырԥылеит. Аиԥылара аҿы ирылацәажәеит анаҩстәи аусеицура, акурсантцәа аҵараҿы рихьӡарақәеи рлеишәеи ирыдҳәалоу азҵаарақәа. Иара убас 2024-2025 шш. аусеицура азы азԥхьагәаҭарақәа ҟаҵан.
Роберт Киут, аԥснытәи акурсантцәа рахь ихы рханы, Урыстәыла аҩныҵҟатәи аусқәа Рминистрра иреиӷьу аҵараиурҭақәа ируаку аҿы ироуз атеориатә дыррақәа, ишьаҭарку азанааҭтә ҽазыҟаҵарақәа, иара убас аморал-ԥсихологиатә ӡрыжәра ҳаԥхьаҟа азинхьчаратә усбарҭақәа русзуҩцәа русуразы акырӡа зҵазкуа, узықәгәыӷыртә иҟоу уасхырны иҟалоит ҳәа инаҵшьны иазгәеиҭеит.
Роберт Киут ауниверситет анапхгараҭареи арҵаҩратә коллективи амаҵзура аветеранцәеи иҿыцу афицарцәа рабиԥара ахьазыҟарҵо азы иҭабуп ҳәа реиҳәеит. «Урыстәыла аҩныҵҟатәи аусқәа Рминистрра иатәу Краснодартәи Ауниверситет аҿы апрестиж змоу аҵарадыра роуны, афицар ҿарацәа анаҩстәи рмаҵураҿы жәаҳәарада ақәҿиарақәеи аихьӡарақәеи аадырԥшуеит», - ҳәа иҳәеит Роберт Киут.
Алеитенант еиҵбы Давид Амаба акурсантцәа даара пату ақәырҵоит, уимоу иазгәдууп Урыстәыла иреиӷьу аҵараиурҭақәа рҿы аҵаразы алшара ахьроуз ҳәа иҳәеит.
