Аҟәа. Ԥхынҷкәынмза 16, 2023 шықәса. Аԥсныпресс. Аԥсны Гагра араиони Шәача ақалақьи аиҩызареи аусеицуреи рзы аиқәшаҳаҭра рыбжьарҵеит. Аусшәҟәы анапаҵыҩра мҩаԥысит ԥхынҷкәынмза 15 рзы. Уи рнапы аҵарҩит Асҭан Агрбеи Виктор Филонови, ҳәа адырра ҟанаҵоит «Кубань Информ».
Уаанӡа адепутатцәа Иури Немцеви Дауҭ Ақаҩбеи аиқәшаҳаҭра апроект азааҵаҩра мҩаԥыргеит.
Аҩқалақьк рыбжьара макьана аофициалтә еизыҟазаашьақәа шьақәыргыламызт. Рнапы зҵарҩыз аиқәшаҳаҭра иабзоураны адоуҳатәи акультуратәи мазара шьаҭас измоу аиашьаратә еизыҟазаашьақәа рыҿиара иацхраауеит, иара убас Гагра араиони Шәачеи рыбжьара аусеиура арҿиоит.
«Аиқәшаҳаҭа анапаҵыҩра ҳпарламентқәа рыбжьара аизыҟазаашьақәа иҿыцу рдаҟьа аанартуеит. Агәра ганы сыҟоуп, уи аҩганктәи аимадарақәа рзы алшарақәа рҳәаақәа дырҭбаауеит. Уи, адепутатцәа рзакәанԥҵаратә усураҿы аҩ-парламентк рхаҭарнакратә усбарҭақәа рҿы иаԥырҵаз иреиӷьу рхархәаразы алшарақәа рзаатуеит ауп иаанаго», – ҳәа иазгәеиҭеит Виктор Филонов.
Асҭан Агарба аиқәшаҳаҭра анапаҵыҩра ихаҭоу хҭысуп ҳәа иазгәеиҭеит.
«Ҳара ҳзы ари акырӡа аҵанакуеит. Уи иабзоураны аԥышәеимадара ҳабжьалоит. Еиҳа инҭкааны иуҳәозар, уи Гагра араиони Шәачеи рыбжьара аусеиура арҿиоит аҿартә, акультуратә, арҿиаратә, аспорттә, аҵараиуратә, атуристтә еиҿкаарақәа рыбжьара, апрофессионалтәи ахалаԥшьгаратәи рҿиаратә коллективқәа, аспорттә командақәа, атуристтә гәыԥқәа рԥышәеимадара иацхраауеит», – ҳәа иазгәеиҭеит Астҭан Агрба.
Аиқәшаҳаҭра аҳәаақәа ирҭагӡаны амассатә информациа ахархәагақәеи аофициалтә интернет-порталқәеи рыла Шәача ақалақь аимиџь Гагра араион ауааԥсыра рҿаԥхьа ашьҭыхра, убасҵәҟьа Шәача ауааԥсыра рҿаԥхьа Гагра ақалақь аимиџь ашьҭыхра азԥхьагәаҭоуп.
