Аҟәа. Ԥхынҷкәынмза 15, 2023 шықәса. Аԥсныпресс. Аҵарадырра аусхкы аҭагылазаашьа иазкын иахьа, ахәаша, ԥхынҷкәынза 15 рзы, Апарламент аҿы имҩаԥысыз аҵарадырра, анаука, абызшәатә политика, адинхаҵара, амассатә информациа ахархәагақәа русқәа рзы апарламенттә Еилакы аилатәара. Уи мҩаԥигон Аилак ахантәаҩы Инар Саӡба.
Адепутатцәа рааԥхьарала аилатәара рхы аладырхәит иара убас атәыла аҵарадырра аминистр актәи ихаҭыԥуаҩ Ада Кәарҷелиеи Аҟәа ақалақь араионқәеи рҵарадырра аҟәшақәа рнапхгаҩцәеи. Урҭ инарҭбааны адепутатцәа ирзеиҭарҳәеит аҵарадырраҿы иҟоу аҭагылазаашьа атәы.
Аилатәара иалахәыз арҵаҩцәа акласстә напхгареи атетрадқәа ргәаҭареи рзы, иара убас абжьаратәи ашколқәа рдиректорцәеи аҵара аҟәша аиҳабацәеи руалафахәы ацҵақәа рышьҭыхра ахымԥадатәреи аҵарадыра Аминистрра абаланс аҿы иҟоу абжьаратәи ашкол аҿы раԥхьа апробациа ахысрада алгебреи агеомтриеи рзы аԥышәарақәа рыҭира аҵаҵӷәырызаареи ирыдҳәалоу азҵаарақәа ирылацәажәеит.
Апарламент «2024 шықәсазы Ареспубликатә биуџьет азы» азакәан апроект аус адулара инамаданы, аилатәара иалахәыз аҵарадырра асистема афинансыркра ахышәа-ҵышәеи ахырхарҭақәеи ирылацәажәеит.
Аилатәара аҿы иара убас арҵаҩратә еилазаара агәҭынчымра рызцәырызго егьырҭ апроблемақәа жәпакы ирзааҭгылеит, ахәҭакахьала, аҵарадырра аусхкы аҿы аџьаԥса ашәара асистемеи ашколқәа рматериал-техникатә еиқәыршәареи аиҭакрақәа ралагалара ҷыдала ахшыҩзышьҭра арҭеит.
