Гагра аҩныҵҟатәи аусқәа Русбарҭа азинмчы змоу ацуҭаусзуҩцәа рыҟәша аиҳабы Рамин Гамисониа иҟаиҵаз адыррақәа рыла, Мамзышьха ахь уназго амҩала иргылоуп аушьҭра-гәаҭаратә ԥыԥышырҭа, уаҟа уахи-ҽни иҷаԥшьоит Гагратәи амилициа аусзуҩцәа. Урҭ ирыцуп аинспекторцәеи аекологцәеи Гагра араион абнаусзуҩцәеи. Уи зегьы зыҟаҵоу изакәанымкәа аԥсаҵлақәа рыԥҟара аԥхьырҟәҟәаара азы ауп. Амилициа аусзуҩцәа иаауа-ицо автотранспорт гәарҭоит, агәҽанызаара-профилактикатә цәажәарақәа мҩаԥыргоит.
Аԥсабарахьчара иаҵанакуа аҵиаақәа рыԥҟара азы Аԥсны азакәанԥҵара иазԥхьагәанаҭоит ашьуӷатә ҭакԥхықәра.
2022 шықәсазы, Гагратәи амилициа адыррақәа рыла, изакәанымкәа иԥырҟеит 300 шьапы инареиҳаны «амза» ҳәа изышьҭоу агәырҵлақәа, Аԥсны Ашьаустә Закәанеидкыла ахәҭаҷ 257 («Изакәанымкәа аҵлақәеи ачықьақәеи рыԥҟара») ала аусеилыргарақәа ԥшьба хацыркын.
Атәыла аҩныҵҟатәи аусқәа рминистр Роберт Киут идҵа инақәыршәаны, аҳәынҭқарратә абнатә фонд, апаркқәа, аскверқәа рҿы изакәанымкәа аԥсаҵлақәа рыԥҟареи анаҩс изакәанымкәа урҭ рыҭиреи аԥхьырҟәҟәаара азы, аҩныҵҟатәи аусқәа Рминистрра араионтә ҟәшеиҵақәа русзуҩцәа ԥхынҷкәынмзазы ҷыдала ареидтә уснагӡатәқәа мҩаԥыргараны иҟоуп. Аԥсаҵлақәа рыҭиразы иахәҭоу азин рызҭо ақьаадқәа рыда аус зуа ауаа аҭакԥхықәра иақәыршәахоит.
