Аҟәа. Абҵарамза 29, 2023 шықәса. Аԥсныпресс. Урыстәылатәи иреиҳаӡоу аҵараиурҭақәа ирҭаларц зҭаху аҳәаанырцәтәи атәылауаа рзы адкыларатә кампаниа ахыркәшара аҟынӡа мышқәак роуп иаанхаз, ҳәа адырра ҟанаҵоит Аԥсны иҟоу Урыстәыла аус ацура азы Ахаҭарнакра.
Сынтәа Урыстәылатәи Афедерациа аквотақәа рыла аҵараиура азы азыҳәамҭақәа ралаҵара аҽҳәара иацҵахеит. Аԥсны иҟоу Урыстәыла аус ацура азы Ахаҭарнакра еилкааны ас еиԥш ашьаҿа ҟанаҵеит, иара убри ала заԥхьаҟа истудентцәахараны иҟоу аусшәҟәқәа ралаҵара иазыԥҵәоу аҽҳәара ацҵарала урҭ урыстәылатәи аҵарадырра асистемеи зинтерес рымоу аҵараиурҭақәеи рзы адыррақәа цқьа еилыркаартә еиԥш алшара рзаԥнаҵеит.
«Аҟыбаҩи ахықәкынагӡареи злоу аҳәаанырцәтәи атәылауаа абакалавриат, специалитет, магистратуреи аспирантуреи иҭалар алшоит. Урыстәылатәи ауниверситетқәа адунеитә реитингқәа рҿы иреиӷьу апозициақәа ааныркылоит, урҭ еиуеиԥшым аусхкқәа рыла, IT-технологиақәа инадыркны амедицинеи арҿиаратә занааҭқәеи рҟынӡа аспециалистцәа разыҟаҵара иҳараку аҩаӡара ала еицырдыруеит», - ҳәа иазгәаҭоуп Аԥсны иҟоу Урыстәыла аус ацура азы Ахаҭарнакра апресс-релиз аҿы.
Урыстәылатәи Афедерациа иреиҳаӡоу аҵараиуреи анауки Рминистрра адыррақәа рыла, ааигәатәии инаскьоуи аҳәаанырцәтәи атәылақәа рҟынтәи астудентцәа рзы абиуџьеттә ҭыԥқәа рхыԥхьаӡара 2024-тәи ашықәс азы иҳаҩсуа ашықәс аҩаӡараҿы иаанхоит. Убас, 2023 шықәсазы Урыстәылатәи Афедерациа Анапхгара аквота ала иазоужьхеит 30 нызықь ҭыԥ. Иахьа урыстәылатәи аҵараиурҭақәа рҿы аҵара рҵоит 4 миллион-ҩык, урҭ рахьынтә 324 нызықь-ҩык – аҳәаанырцәтәи астудентцәа роуп.
Аҳәаанырцәтәи астудентцәа рҵара аамҭа иалагӡаны (иназыцҵоу апрофессионалтә ҵарадырра уахь иналамҵакәа) абиуџьет ахарџь ала аҵара зҵо урыстәылатәи астудентцәа ираҟараны ирызшәахоит астипендиа, иара убас азеиԥшеиланхарҭа аҿы аҭыԥ рыҭахоит. Иахәҭоу аҩаӡараҿы аурыс бызшәа ззымдыруа акандидатцәа хәыда-ԥсада урыстәылатәи аҵараиурҭақәа рҿы еиҿкаау аҽазыҟаҵаратә курсқәа ирхысыр алшоит. Урҭгьы убасҵәҟьа астипендиа рызшәахоит, азеиԥшеиланхарҭаҿы анхарҭаҭыԥ рыҭахоит. Азыҳәамза дәықәҵазар алшоит ԥхынҷкәынмза 1 аҟынӡа апортал www.education-in-russia.com аҿы.
