«Ҳара абар шьҭа хынтәуп ацәыргақәҵа ҳаҭаауеижьҭеи, есымша иҿыцу, хра злоу адыррақәа ҳауеит. Ақыҭанхамҩа аусхкы активла аҿиара иаҿуп, есышықәса атехнологиақәа рҿыцхоит, еиӷьыртәует. Иаагозар, ақыҭанхамҩатә дронқәа иахьа ҳара иҳамоу раасҭа акыр еиӷьуп, еиҳа ирҿыцуп. Рыцҳарас иҟалаз, ҳара иарбоу аусхкы аҿы ҳаҿиара активла изымҩаԥысӡом, убри аҟнытә ас еиԥш иҟоу ацәыргақәҵақәа рылахәхара акыр хра аланы иҟоуп, ҳара иаабоит иарбан хырхарҭоу иалхтәу». 

Ҭемыр Мықәба иара убас  Ацәыргақәҵа аҿы аимадарақәа ҿыцқәа рыбжьаҵареи уаанӡа и  ҟаз рырӷәӷәареи шзалыршахаз азгәеиҭеит. Аиҭаҳатәқәа зааӡо анаплакқәа рхаҭарнакцәа ҳрабадырит, ҳрыҿцәажәеит. Урҭ ирааӡо аиҭаҳатәқәа, анаҩс дара Аԥсны ишанаало, ишазҳауа аилкааразы ақыҭанхамҩеи ақыҭеи рыҿиара Ацентр Аексперименталтә плошьадка ахь аагара азԥхьагәаҭоуп.   

Ацәыргақәҵа «ЮГАГРО» —  Урыстәыла иахьаҵанакуа зегьы реиҳа идуу ақыҭанхамҩатә техника, аиқәыршәагақәа, аҵиааӡареи ақыҭанхамҩеи раалыҵ аҭыжьреи аарыхреи аус адулареи рзы аматериалқәа рцәыргақәҵа ауп.