Гагра араион акоммуналтә маҵзурақәа Иҷыдоу аҭагылазаашьақәа рзы Аминистрра аҟәшеиҵақәеи Аунитартә Наплакы «Амшынеиқәафымцамчи» русзуҩцәа еицхырааны амшынтә цәырҵра бааԥсы ахҟьаԥҟьақәа рыхәҭак ықәыргеит. Афымцалашарала аиқәыршәара аиҭашьақәыргылара иазку аусурақәа рынагӡара хаҭала ахылаԥшра арҭон «Амшынеиқәафымцамч» анапхгараҭара ахаҭарнакцәа Ҭенгиз Гирџьынбеи Рамин Зингишвилии.
Гагра араионтә фымцатә Станциа аиҳабы Аслан Аиба иҟаиҵаз адыррақәа рыла, Гагра ақалақь фымцалашарала аиқәыршәара маҷк ада еиҭашьақәыргылоуп, мацара иаанханы иҟоу аҩнеихагылақәа ҩба заҵәык роуп. Арҭ аҩнқәа рыгәраҵақәа аӡы ахьрыҵалаз иахҟьаны фымцалашарада иаанханы иҟоуп. «Афымцалашарала аиқәыршәара аиҭашьақәыргылара иазку аусурақәа ирылагоит аӡы анцалак ашьҭахь», - ҳәа иазгәеиҭеит иара.
Гагра араион анапхгара иҟанаҵо адыррақәа рыла, аӡхагаларатә агрегатқәак ԥсахтәхоит.
Аҟәа ақалақь ахада Беслан Ешба иҟаиҵаз адыррақәа рыла, иҟалаз аԥсабаратә цәырҵра бааԥсы иахҟьаны хәҭакахьала Аҟәа ақалақь, «Алашарбага» аҳабла аҿы ахатәы ҩнқәак ааха роуит.
Алеқсандр Анқәаб амшцәгьа ахҟьаԥҟьақәа рықәгара иалаху ахылаԥшырҭақәа рнапхгаҩцәеи аҭыԥантәи амчра аусбарҭақәеи аусурақәа рымҩаԥысшьа азы адыррақәа рыҟаҵара азы анапынҵақәа риҭеит.
