Аимадареи амассатә коммуникациақәеи ацифратә ҿиареи рзы аҳәынҭқарратә Еилакы ҳазҭоу 2023 шықәса нҵәаанӡа  атәыла ацифратә ҿиара аконцепциа аиқәыршәара азԥхьагәаҭаны иамоуп.  Уи аекспертцәа ианҭырҵаалак ашьҭахь, Аԥсны анапхгара ахь ашьақәырӷәӷәаразы идәықәҵахоит.

Зураб Џьынџьал игәаанагарала, иарбоу аусхкы аҿы астратегиатә планҟаҵара азы аусшәҟәы аҟамзаара атәыла азы хра аманы иҟаӡам.  Аԥсны имаҷӡам ареспублика ацифратә информациатә ҵакыра аԥҵара ахь ааԥхьара зҭатәу ауаа.  

«Иазгәасҭарц сҭахуп уи зыӡбахә сымоу аҿар еиԥш абжьаратәи абиԥара ахаҭарнакцәагьы  шраку. Урҭ зегьы ҳнаукатә кадрқәа роуп, аҭыԥантәи азанааҭтә математикатә кадрқәа, уи  IT ҳәа изышьҭоу аусхкы аҿы иҿыцу асециалистцәа роуп», – ҳәа иазгәеиҭеит Зураб Џьынџьал.

Иара игәаанагарала, Аԥсны ацифратә ҿиара ихадоу аконцепциақәа ируаку адыррақәа аус рыдулара Ацентр абазала амилаҭтә кадрқәа раԥҵара ауп. Аԥснытәи аҳәынҭқарратә Университет абазала аинформациатә технологиақәа рзы иҿыцу акафедра аԥҵахоит.  ААУ аҿы астудентцәа аҵара ддырҵалоит аҭыԥантәи аспециалистцәа реиԥш Урыстәылантәи ааԥхьара зауз аспециалистцәагьы.

Аԥсны акыр шықәса раахыс қәҿиарала аус руеит ателекоммуникациатә Еилазаарақәа «Аҟәафон» (www.aquafon.com),  «А-Мобаил» (www.a-mobil.biz). Урҭ доусы русбарҭақәа рҿы зхаҭабзиара ҳараку акадртә потенциал дырҳаит.  Урҭ рхыԥхьаӡараҿы иҟоуп иара убас аилазаара «Система» ( https://www.cyxym.net/)

IT аусхкы аганахьала аҭыԥантәи акадрқәа разыҟаҵара азы қәҿиарала имҩаԥгаз проектны иҟоуп иара убас анапхгаратә еимадаразы Агентрагьы.  

Ари аҳәынҭқарратә структура хра злоу иԥхьагылоу аԥышәа арҳаит. «Даараӡа ишьахуп IT аусхкы аҿы Аԥсны  аҩныҵҟатәи аконкуренциа ахьыҟоу», – ҳәа иажәа хыркәшо инаҵшьны иазгәеиҭеит аинформациатә Маҵзура аҿцәажәаҩ.