Аҟәа. Абҵарамза 24, 2023 шықәса. Аԥсныпресс. Аԥсны аԥыза-министр Алеқсандр Анқәаб ажурналисттә конкурс «Взгляд 2023» аихшьаалақәа рымҩаԥгара иадҳәалоу ацеремониа ахалархәра азы Аԥсныҟа иааз, аинформациатә Маҵзура ТАСС адиректор Хада Андреи Кондрашиов знапхгараҿы дыҟоу аинфомациатә Маҵзура аделегациа идикылеит.
Аминистрцәа Реилазаара апресс-маҵзура иҟанаҵо адыррақәа рыла, Аԥсны иҟоу аҷыдалкаатә зинмчы змоу Урыстәыла ацҳаражәҳәаҩ Михаил Шургалини Урыстәыла аус ацуразы Аԥсны иҟоу Ахаҭарнакра анапхгаҩы Дмитри Федотови злахәыз аиԥылааҿы аинформациатә еимадареи аԥснытәи амассатә информациа аусзуҩцәа рзанааҭтә дырра ТАСС аҿы ашьҭыхреи ирыдҳәалоу аусеицура азҵаарақәа шьҭырхит.
Аганқәа абар шьҭа ҩышықәса ирылагӡаны, Урыстәыла аус ацура азы Аԥны иҟоу Ахаҭарнакра ахылаԥшрала Аԥсны имҩаԥысуа ажурналисттә конкурс «Взгляд» акыр ахәшьара ҳаракы арҭеит, иара убас ашьақәгылара иаҿу атрадициа ацҵара шхымԥадатәиу азгәарҭеит.
Сынтәа имҩаԥысыз аконкурс Аԥсны Афырхаҵа, Аԥсны аҳҭнықалақь ахақәиҭтәраан иҭахаз ТАСС арратә фотокорреспондент Андреи Соловиов изкхеит.
Атәыла аԥыза-министр асасцәа агәра диргеит Аԥсни Урыстәылеи ирзеиԥшу аинформациа-культуратә ҵакыра аиқәырхара иазку апроектқәа аринахысгьы адгылара шрыҭахало азы.
