Аҟәа. Абҵарамза 23, 2023 шықәса. Аԥсныпресс. Еицырдыруа асоветтәии урыстәылатәии аҵарауаҩ-азиндырҩы, Урыстәылатәи Афедерациа Аконституциатә Ӡбарҭа ԥыхьатәи аӡбаҩ Зҽаԥсазтәыз азиндырҩы Анатоли Леонид-иԥа Кононов иԥшәмаԥҳәыс - Лиудмила Кабанова лыԥшәма ихатәы библиотека Аԥсны аҳәынҭқарратә Университет Д.И.Гәлиа ихьӡ зху Анаукатә библиотека ҳамҭас иалҭеит, ҳәа адырра ҟанаҵоит ААУ аинформациеи амедиакоммуникациақәеи рыҟәша.
Акырӡа ирацәоу, 69 коробка ирҭоу, еиуеиԥшым ахьӡқәа змоу, ҳамҭас иаашьҭыз ашәҟәқәа рхыԥхьаӡараҿы иҟоуп акырӡа зҵазкуа аиуриспруденциа, азин, асоциологиа, апсихологиа, адинхаҵарадырра, аҟазарадырра, иара убас аусшәҟқәеи адискқәеи.
Ас еиԥш абзиара аҟаҵара Кононоваа рҭаацәара ҷыдала Аԥсны разыҟазаара ауп, иара убас лара Лиудмила Кабанова лхаҭа акыр шықәса раахыс аԥсуа жәлари лареи ирыбжьоу аимадареи роуп изыдҳәалахаз.
«Анатоли Леонид-иԥа, жәаҳәарада иԥсы ҭазҭгьы, акыр игәы иаахәарын ихатәы библиотека аҟынтәи ашәҟәқәа Аԥсны еиҵагыло аҿар ирыхәо иахьыҟалаз», - ҳәа иазгәалҭеит аҵарауаҩ иԥшәмаԥҳәыс Лиудмила Кабанова.
Аидара Москвантәи Аҟәаҟа аагара аиҿкаара ихахьы игеит Москватәи аԥсуа диаспора ахада Беслан Агрба.
ААУ актәи апроректор Роман Дбар Лиудмила Кабанова ауниверситет иалҭаз хәызмаӡам аҳамҭа азы иҭабуп ҳәа леиҳәеит, убри аан уи Анатоли Леонид-иԥа ибиблиотека аҟынтәи ашәҟәқәа ААУ апрофесионалтә кадр ҿыцқәа реиҵааӡара азы аҵаратә процесс аиҿкаараҿы акыр ицхыраагӡа дуны иҟалоит ҳәа иазгәеиҭеит.
Анатоли Леонид-иԥа Кононов Урыстәылатәи Афедерациа Аконституциатә ӡбарҭа раԥхьатәи аӡбаҩцәа дреиуан. Уи ари амаҵураҿы аус иуит 1991 шықәса инаркны 2009 шықәсанӡа. Иара 40 инарзынаԥшуа анаукатә усумҭақәа дравторуп, ашьауӷаус, акриминологиа, аҳәынҭқарреи азини ртеориа, аконституциатә иашаӡбара уахь иналаҵаны.
