Аҟәа. Абҵарамза 22, 2023 шықәса. Аԥсныпресс. Апартиақәеи ауаажәларратә еиҿкаарақәеи Реидгыла Жәлар Реизара-Апарламент ԥыхьатәи адепутат Алхас Џьынџьал аҳәынҭқарреи абизнеси рыбжьара амазаратә еизыҟазаашьақәа рганахьала ахылаԥшра арӷәӷәара азы ауаажәларратә комиссиа аԥҵара азы иаԥшьгара иадгылеит.
Ԥыхьатәи адепутат Алхас Џьынџьал Аԥсны аполитикатә партиақәеи ауаажәларратә Еиҿкаарақәеи Реидгылеи аполитиатә партиа «Амцахареи» рышҟа аҳәынҭқарреи абизнеси рыбжьара амазаратә еизыҟазаашьақәа рганахьала ахылаԥшра арӷәӷәара иацхрааша ауаажәларратә комиссиа аԥҵара азы ажәалагала ҟаиҵеит.
Иарбоу атема иаҵоу актуалтә ҵакы ҳасаб азуны, Аидгыла иалоу аполитикатә партиақәеи ауаажәларратә еиҿкаарақәеи рнапхгаҩцәа ари аидеиа иалацәажәеит, анаҩс уи аопозициатә политикатә партиақәеи аиҿкаарақәеи рнапхгаҩцәа рыҿцәажәара аиҿкаара аформала ари аԥшьгара адгылара аҭаразы аӡбамҭа рыдыркылеит.
«Аидгыла уажәаԥхьагьы изныкымкәа аполитикатә процесс иалоу аганқәа зегьы адиалог рыбжьаҵара азы ааԥхьара ҟанаҵон, иара уажәгьы атәыла аҿы иҟоу еиуеиԥшым аполитикатә мчрақәа рхаҭарнакцәа рыбжьара акомуникациақәеи еиуеиԥшым аплошьадкақәа рҿы конкретла азҵаарақәа рыӡбаразы аконструктивтә ажәалагалақа рылацәажәареи ирызхиоуп», – ҳәа аҳәамҭа ҟарҵеит Аидгыла аҿы.
