Аҟәа. Абҵарамза 02,2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аминистрцәа реилазаара Аԥыза-министр Актәи ихаҭыԥуаҩ Џьансыхә Нанба дыдирдырит.
«Иацы сара Аусԥҟақәа ҩба снапы рыҵазҩит. Актәи Аусԥҟа Аԥыза-аминистр актәи ихаҭыԥуаҩ Беслан Џьапуа хатәгәаԥхарала имаҵзура ааныжьра иазкуп. Исҭахуп иҭабуп ҳәа иасҳәарц. Ҳара ҳкомандаҟны ақыҭанхамҩа аминистрс дынхоит. Аҩбатәи Аусԥҟа Џьансыхә Нанба Аԥыза-министр актәи ихаҭыԥуаҩыс иҟаҵара иазкуп. Ари ауаҩ шәара ибзианы дыжәдыруеит. Агәыӷра сымоуп, арҭ акадртә ҽыԥсахрақәа аиҳабыра русура аритм иаԥырхагахарым, рҿаԥхьа иқәгылоу азҵаарақәа рыӡбара иахәап ҳәа»,- иазгәеиҭеит Аслан Бжьаниа.
Беслан Џьапуа Џьансыхә Нанба иусураҿы аихьӡарақәа изеиӷьеишьеит.
Ахәҭакахьала, Џьансыхә Нанба атәыла анапхгара иҭабуп ҳәа реиҳәеит иаадырԥшыз агәрагаразы.
«Сара исылшо зегьы ҟасҵоит, сдырра, сымч-сылша аԥыза-министр Алеқсандр Анқәаб инапхгарала Аминистрцәа реилазаара аусура ахаҭабзиара аиӷьтәра иазыскуеит»,- ҳәа иҳәеит иара.
Џьансыхә Нанба Аԥыза-министр актәи ихаҭыԥуаҩыс иҟаҵаразы Ахада Аусԥҟа инапы аҵаиҩит 2023 шықәса, абҵарамза 1 азы.
