Аҟәа. Жьҭаарамза 30, 2023 шықәса. Аԥсныпресс. Аԥснытәи аделегациа Белорусиа аусуратә ҭаара аҳәаақәа ирҭагӡаны, Аԥсны иҷыдоу аҭагылазаашьақәа рминистр Лев Кәыҵниа Минск ақалақь аҿы Белорусиа аиқәырхаратә хылаԥшырҭа ахада, аҩныҵҟтәи амаҵзура аинрал-маиор Вадим Синиавскии уи актәи ихаҭыԥуаҩ, аҩныҵҟатәи амаҵзура аинрал-маиор Алеқсандр Худолееви дырԥылеит.
Аиԥыларақәа рҿы аҩ-тәылак реиқәырхаратә хылаԥшырҭақәа русеицура иадҳәалоу актуалра злоу азҵаарақәа жәпакы ирылацәажәеит. Лев Кәыҵниа Белорусиа Иҷыдоу аҭагылазаашьақәа рзы Аминистрра аҟәшеиҵақәа рыструктура аиҿкаара, урҭ русура атехниатәи атехнологиатәи еиқәыршәара, аусураҿы изықәныҟәо анапхгаратә нормативқәа, аспециалистцәа разыҟаҵара амҩаԥысшьа, иҷыдоу атехникеи аиқәыршәагақәеи рҭыжьра азҵаарақәа, уҳәа рзы азҿлымҳара ааирԥшит.
Аофициалтә ҟазшьа змаз аиԥыларақәа рыдагьы, Аԥсны аиқәырхаратә хылаԥшырҭа ахада Ареспублика Белоурусиа Иҷыдоу аҭагылазаашьақәа рзы Аминистрра амчрақәа рнапхгараҭара Ацентр, Ауаажәларратә хьчара Аинститут, амцарцәаҩцәеи аԥсеиқәырхаҩцәеи разыҟаҵаразы аполигонқәа, еиуеиԥшым иҷыдоу аҭагылазаашьақәа римитациеи урҭ рыхҟьаԥҟьақәа рықәгареи рзы алабораториақәеи атренажиортә комплексқәеи, иара убас Белорусиа Иҷыдоу аҭагылазаашьақәа рзы Аминистрра аҭаххрақәа рзы иҷыдоу атехникеи аиқәыршәагақәеи ахьҭрыжьуа ацехқәеи дырҭааит.
Ареспублика Белорусиа Иҷыдоу аҭагылазаашьақәа рзы Аминистрра анапхгараҭара рԥыларақәа раан аԥсуа ган ала Белорусиа апрофильтә ҵаратә усбарҭақәа рҿы аԥснытәи амцарцәаҩцәеи аԥсеиқәырхаҩцәеи разыҟаҵара атемагьы ықәыргылахеит.
