Аҟәа. Жьҭаарамза 30, 2023 шықәса. Аԥсныпресс. Аԥсны акультура аминистр Даур Ақаҩба ителеграмм-канал аҿы иахьа инаркны иара Аԥсны акультура аминистр имаҵураҭыԥ шааинижьуа азы аҳәамҭа ҟаиҵеит.
«Сара ас еиԥш аӡбамҭа сыдыскылеит даҽа усурак ахь сыиасра инамаданы. Аминистр имаҵураҭыԥ аҿы сусура аамҭа иалагӡаны ҳара иҳалҳаршаз маҷӡам, аус еицызуаз доусы рыхшыҩи рымчи еилаҵаны аинтерес зҵоу амҩа ду ҳанысит. Ари иухамышҭуа, аинтерес зҵоу апроектқәа, аимадара ҿыцқәа рыбжьаҵара, есымша адырра ҿыцқәа рырҳара, уҳәа рыла игәылҭәааз аԥышәа акәын», - ҳәа иҩит Даур Ақаҩба.
Иара акультура Аминистрра аколлективи акультура аусзуҩцәеи хра злоу аусеицуразы иҭабуп ҳәа реиҳәеит.
«Шәареи ҳареи ҳусеицура аинтерес зҵоу хра злоу аамҭаны иҟан. Сара ахаангьы исхашҭраны сыҟаӡам шәара зегьы аусураҿы исышәҭаз ацхыраареи адгылареи гәыкыла шәнапы злаку аусура азнеиреи», - ҳәа иазгәеиҭеит Даур Ақаҩба.
Иара акультура Аминистрра аколлектив Аԥсадгьыл аизҳазыӷьара ахьӡала хра злоу аусуреи аихьӡарақәеи рзеиӷьаишьеит.
