Аҟәа. Жьҭаарамза 23, 2023 шықәса. Аԥсныпресс. Жьҭаарамза 23 рзы амаршрут Ҭҟәаԥс – Шәача – Гагра ала ибжьоу адәыӷба № 927/928 «Сочи» атуристтә сезон хнаркәшоит, ҳәа адырра ҟанаҵоит Урыстәылатәи Аихамҩақәа рофициалтә саит.
Ҳазҭоу ашықәс азы ари адәыӷба ала рыиагара еиҿкаахеит 40 нызықьҩык инареиҳаны апассаџьырцәа. Ари асезон аҿы иҿыцу лагамҭаны иҟалеит агьамабаратә тур «Аԥсны агьама». Уи аҳәаақәа ирҭагӡаны аныҟәаҩцәа амлагәырааӡарҭатә нхамҩа аҭаара, ашәқәеи акәацырҩеи рыҟаҵара азы амастер-классқәа рылахәхара азы алшара роуит.
Атуристцәа рыманшәалара азы иара убас амшеихша рыԥсахит: урҭ ҩ-сааҭк рыла заа авокзал ахь анеира иалагеит, шьҭахьҟа ицон уаанӡа иазԥхьагәаҭаз аамҭа аҵкьыс сааҭбжак рыла иацҵаны.
Асезон анҵәамҭазы адәыӷба иацҵахеит даҽа анапшырҭатә вагон, уаантәи Аԥсны аҭыԥ ԥшӡарақәеи иблахкыгоу апеизажқәеи рбара ҟалоит.
Атуристтә дәыӷба «Сочи» ашықәсҿыцтәи аныҳәатә ԥсшьарамшқәа раан: ԥхынҷкәынмза 31 рзы, иара убас ажьырныҳәамза 2 – 7 рзы амаршрут ҩаԥхьа аусура хацнаркуеит. Арҭ арыцхәқәа рзы абилетқәа рыҭира иалагахьеит, ҳәа адырра ҟанаҵеит Нхыҵ Кавказтәи Аихамҩа акорпоротивтә коммуниациақәа рмаҵзура.
