«Ҳара азакәанԥҵарақәа реишьашәалара азы аусмҩаԥгатәқәа рӷьырак наҳагӡахьеит. Урыстәылатәи аган уи аилатәараҿы ишьақәнарӷәӷәеит, убри аҟнытә сара адепутатцәа иҭабуп ҳәа расҳәарц сҭахуп ари аҩыза алҵшәақәа рзы. Иаартны исҳәарц сҭахуп, адепутатцәа ркорпус адгыларада ас еиԥш алҵшәақәа раарԥшра ҳалымшаргьы ҟаларын», – ҳәа адепутатцәа рахь лхы рханы илҳәеит Кристина Озган.
Аекономика аминистр иҟалҵаз адыррақәа рыла, жьҭаарамза 17 рзы Москва ақалақь аҿы ҩ-тәылак рзакәанԥҵарақәа реишьашәалара ала ишьаҭаркны Аԥсни Урыстәылеи рыбжьара азеиԥш социалтәи аекономикатәи аҵакыра аԥҵара Апрограмма анагӡаразы аусуратә гәыԥ аилатәара мҩаԥысит. Аминистр лажәақәа рыла, аилатәараҿы ишьҭыхыз атемақәа рыла атәанчаратә еиқәыршәара, агәабзиарахьчара аусхкы аҿы ихадоу азҵаарақәа, аҳазылхратәи ашәахттәи азакәанԥҵарақәа реишьашәалара, уҳәа убас егьырҭ азҵаарақәа ыҟан.
Аиԥылара аҿы Апарламент Аиҳабы анапаҵыҩразы еиқәыршәахо аиқәшаҳаҭрақәа зегьы аиқәыршәара аетап аҿы адепутатцәа ишахәҭоу ала иахәаԥшырц азы адгалара мҩаԥгазароуп ҳәа иазгәеиҭеит. Аекономика аминистр ари адепутатцәа раԥшьгара дадгылеит.
