Дмитри Вольвач иажәақәа рыла, «арҭ аусмҩаԥгатәқәа аинтеграциатә проекткқәа рацәаны рынагӡареи ҳтәылақәа ринвестициатә потенциал ашьҭыхреи алдыршоит».

Аиԥылара аҿы уи алахәылацәа апрограмма анагӡара аихшьаалақәа ҟарҵеит, иара убас ирылацәажәеит уи анагӡара иадҳәалоу актуалра злоу азҵаарақәа жәпакы – ҩбаны иҟоу ашәахтәқәҵара, аҳазылхратә усеиҿкаара, асоциалтәи абанктәи аусхкқәа русмҩаԥгатәқәа реиҿкаара, уҳәа ирыдҳәалоу азҵаарақәа.

«Ҳазҭоу ашықәс – ҳтәылақәа рзакәанԥҵарақәа реишьашәалара азы аусмҩаԥгатәқәа анхҳаркәшо ауп, – ҳәа иазгәеиҭеит аминистр ихаҭыԥуаҩ. – Апрофильтә хылаԥшырҭақәа апрограмма апунктқәа рынагӡара иазкны активла, акоординациа змоу аусура анагӡара иацырҵоит. Иазԥхьагәаҭаз аумҩаԥгатәқәа реиҳарак иахьазы анагӡара алыршоуп, урҭ рӷьырак  ахыркәшаратә стадиаҟынӡа инаӡахьеит».

Ахәҭакахьала, Аԥсны аԥыза-министр ихаҭыԥуаҩ, аекономика аминистр Кристина Озган, азакәанԥҵарақәа реишьашәалара апрограмма аҳәаақәа ирҭагӡаны ахылаԥшырҭақәа инарыгӡо аусура ипреценденттәу аҟазшьа рымоуп ҳәа инаҵшьны иазгәалҭеит.  

«Урыстәылатәи Афедерациеи Аԥсны Аҳәынҭқарреи анорма-зинтә хырхарҭа аганахьала русеицура ҳаамҭазтәи аҭоурых аҿы мҽхакы ҭбаала аусура мҩаԥгоуп.  Ари аусура ҳҳәынҭқаррақәа рыбжьара еиҳа аеффективра злоу аекономикатә, аинвестициатә, агуманитартә усеицура аҿиара иацхраауеит», - ҳәа илҳәеит лара.

Аилатәара ахыркәшамҭаз аганқәа Урыстәылеи Аԥсни рҳәынҭқарратә усбарҭақәа русура активизациа азуреи апрограмма ихадоу аусмҩаԥгатәқәа  2023 шықәсанӡа рхыркәшареи ирызкны аӡбамҭақәа рыдыркылеит.

Аҩ-ҳәынҭқаррак Рхадацәа рнапынҵақәа рыла аҳәынҭқаррақәа рзакәанԥҵарақәа реишьашәалара иазку аусура хацыркын 2021 шықәсазы. Иарбоу аамҭа иалагӡаны Урыстәылеи Аԥсни  аҩ-ҳәынҭқаррак ренергетика, ршәахтәқәҵаратә усеиҿкаара, ринвестициатәи рбанктәи усура, асоциалтә бгаԥсара, атәанчахәытә еиқәыршәара реиԥш иҟоу ихадоу аусхкқәа рҿы аусеицура аҭышәынтәалара алыршахеит.

Аилатәара иалахәын аҩтәылак иртәу афинансқәа Рминистрра, аџьатә еиқәыршәара, аиустициа, адәныҟатәи аусқәа, аҩнуҵҟатәи аусқәа, агәабзиарахьчара, афинансқәа, ахәаахәҭра Рминистррақәа, Аҳазалхратә маҵзура, Урыстәыла арра-техникатә усецуразы Афедералтә Маҵзура, Урыстәыла аекспорттәи атехникатәи ахылаԥшразы Афедералтә Маҵзура, Урыстәыла Абанк уҳәа аусбарҭақәа рхаҭарнакцәа.