Аҟәа. Жьҭаарамза 18, 2023 шықәса. Аԥсныпресс. Аԥсныҟа иааит амилаҭтә политикеи адинхаҵара азҵаарақәеи рзы аминистр актәи ихаҭыԥуаҩ Арсен Махмудов напхгара зиҭо Даӷьсҭантәи аделегациа.
Аделегациа иаԥылеит Аԥсны акультура аминистр Даур Ақаҩбеи И. Папасқьыр ихьӡ зху Амилаҭтә библиотека адиректор Борис Ҷолариа.
Ԥхынҷкәынмза 17 рзы даӷьсҭантәи аделегациа иалахәу Аҟәа ақалақь аҿы игылоу ашәҟәыҩҩцәа Баграҭ Шьынқәбеи Дырмит Гәлиеи рбаҟақәа амҵан ашәҭ шьыҵәрақәа шьҭарҵеит, иара убас Д.Гәлиа иҩны-амузеи иаҭааит. Дара рзы еиҿкаахеит Аԥсны аҳҭнықалақь аҿы аныҟәара.
Ахаша, жьҭаарамза 18 рзы, Даӷьҭан ахаҭарнакцәа Аԥсны аҳәынҭқарратә Университет аҿы имҩаԥысраны иҟоу жәларбжьаратәи афорум «Гамзатови Аԥсни: амилаҭи азеиԥшуаҩытәсареи рыбжьара» рхы аладырхәуеит.
Аделегациа аилазаараҿы иҟоуп: Краснодартәи атәылаҿацә аҟны Ареспублика Даӷьсҭан Анапхгара ахаҭарнак Магомед Нурудинов, Урыстәылатәи Афедерациа Афырхаҵа Загид Загидов, Ареспублика Даӷьсҭан Р. Гамзатов ихьӡ зху Амилаҭтә библиотека адиректор ихаҭыԥуаҩ Магомедрасул Магомедрасулов,Краснодартәи атәылаҿацә аҟны иҟоу Ареспублика Даӷьсҭан Анапхгара ахаҭарнак ицхырааҩ Гитиномагомед Махмудов.
Расул Гамзатов - авар поет, апрозаик, апублицист, аиҭагаҩ, асоветтәи урыстәылатәи ауаажәларратә усзуҩ, диит 1923 шықәса цәыббра 8 рзы Даӷьсҭан Хунзахтәи араион Цада аул аҿы. Иҭрыжьхьеит ипоетикатә, ипрозаикатә, ипублицистикатә шәҟәқәа авар бызшәалеи урыс бызшәалеи, иара убас Даӷьсҭан, Кавказ, адунеи бызшәақәа жәпакы рыла.
