Аҟәа. Жьҭаарамза 18, 2023 шықәса. Аԥсныпресс. Жьҭаарамза 18 рзы Аҟәа ақалақь аҿы иалагеит Зымаха-зышьаха еибгам аинвалидцәа рыбжьара ашьапылампыл-маҷ  азы XI Жәларбжьаратәи атурнир.

Атурнир рхы аладырхәуеит Барнаул, Кемерово, Владикавказ, Чечентәи Ареспублика, Аԥсны аҟынтәи хә-командак.  

Жьҭаарамза 18 рзы Барнаули Кемерови ркомандақәа рыбжьара ахәмарра мҩаԥысит.  Аматч асчион 5:2 ҳәа Барнаул акоманда аиааирала ихыркәшахеит.  

Жьҭаарамза 19, асааҭ 13:00 рзы имҩаԥысраны иҟоуп атурнир аофициалла аартра иазку ацеремониа. Аматчқәа мҩаԥысуеит Аинрал Дбар имҩала иҟоу ашьапылампыл-маҷ адәы аҿы (аӡҭарчы азааигәара).