Аҟәа. Жьҭаарамза 11, 2023 шықәса. Аԥсныпресс. Жьҭаарамза 10 рзы Башкортосҭанҟа аофициалтә визитла дцеит Аԥсны Аҳәынҭқарра Ахада Аслан Бжьаниа. Уфа ақалақь аҳаирбаӷәаза аҿы уи диԥылеит арегион Ахада Ради Хабиров.
Аслан Бжьания Ареспублика Башкортосҭан Амш азгәаҭара иазку аныҳәатә усмҩаԥгатәқәа ихы рылаирхәуеит.
Авизит апрограммаҿы иҟоуп – арегион Ахада Ради Хабиров иԥылара, аԥсуа жәлари абашкир жәлари рыиашьаратә еиҩызара асимволра зуо, Аҟәа Амҳаџьырқәа Рыԥшаҳәа аҟнеиԥш аколоннада ашьапы акразы ахаҳә ашьҭаҵара иазку ацеремониа амҩаԥгара, иара убас асоциалтәи акультуратәи аобиектқәа рҭаара.
