Аҟәа. Жьҭаарамза 11, 2023 шықәса. Аԥсныпресс. Аслан Бжьаниа аррамаҵзураауаа Аԥсны Аҳәынҭқарра Арбџьар мчқәа аԥҵоижьҭеи 31 ш. аҵра рыдиныҳәалеит.
Адныҳәаларатә шәҟәаҿы иҳәоуп:
«Ҳаҭыр зқәу Аԥсны Аҳәынҭқарра аррамаҵзурауаа, Арбџьар мчқәа аветеранцәа,!
Ишәыдысныҳәалоит аҵак ду змоу арыцхә - Аԥсны Аҳәынҭқарра Арбџьар мчқәа аԥҵоижьҭеи 31 ш. аҵра.
1992 ш. ҳажәлар еиҳа иуадаҩыз аамҭа ианҭагылаз, Аԥсны Аџьынџьтәылатә еибашьра ашыкьымҭазы Владислав Арӡынба инапхгарала иаԥҵан Аҳәынҭқарратә атәылахьчаратә хеилак. Аамҭа кьаҿк иалагӡаны раԥхьатәи аибашьратә қәҿиарақәа аарԥшын, уи аԥхьаҟа Аԥсны Аҳәынтҭқарра Атәылахьчара Аминистрреи Аштаб Хадеи раԥҵареи иацхрааит.
Аибашьра анаҩстәи аамҭа иаҳнарбеит ари ашьаҿа ианаамҭаз, ииашангьы ишыҟаҵаз. Аԥсны Аҳәынҭқарра ақырҭуа агрессорцәа ирҿагыланы ақәԥараҟны иагаз Аиааира Аԥсны Аҳәынҭқарра Арбџьар мчқәа раԥҵаразы ирыдыркылаз азыӡба шхымԥадатәыз шьақәнарӷәӷәеит.
Аибашьраҟны Аԥсны Аҳәынҭқарра Арбьар мчқәа рсолдаҭцәеи рофицерцәеи хьӡи-ԥшеи рыманы еибашьуан. Дарбанзаалак урҭ рахьтә агәымшәареи ахамеигӡареи аазыршԥшыз аибашьратә ҳамҭақәеи Аԥсны Афырхаҵа ҳәа ахьӡ ҳараки иаԥсахеит.
Ҷыдала, иҭабуп ҳәа расҳәарц сҭахуп адҵаҟаҵаҩцәа, Атәылахьчара Аминистрреи Аштаб Хада аԥҵареи рхыҵхырҭаҿы игылаз, рыхьӡ ҳтәыла аҭоурых наунагӡа ианызаауеит Аԥсадгьыл ахьчаразы арратә уалԥшьа анагӡараан иҭахаз зегьы.
Абри амш аҽны иҭабуп ҳәа расҳәарц сҭахуп Арбџьар мчқәа рветеранцәа Аԥсны Аџьынџьтәылатә еибашьраҿы иаадырԥшыз агәымшәаразы, аибашьра ашьҭахьгьы Аԥсны аиҭашьақәыргылареи аҿиареи амҩа иананыз Аԥсадгьыл амаҵ азызуаз зегьы.
Ҳазҭагылоу аамҭазы Аԥсны Аҳәынҭқарра Арбџьар мчқәа ҳтәыла ахьынӡанаӡааӡо аҭынчреи, ашәарҭадареи ирхылаԥшуеит. Аҳәынҭқарра аринахысгьы азҿлымҳара ду анаҭоит Арбџьар мчқәа рыҿиареи рырӷәӷәареи. Агеополитикатә цәырҵрақәа ҳгәаҳҽанырҵоит атәылахьчара арӷәӷәара шаҭаху азы.
Арбџьар мчқәа рхатәы еилазаара абџьарла реиқәыршәаразы иҳалшо зегьы ҟаҳҵоит, иаԥаҳҵоит иҿыцу архәҭақәа, харантә ахысра иазку абџьар хкқәа хархәара рзызуа.
Уснагӡатәны ҳҿаԥхьа иқәгылоуп - Ар ҳаамҭа инақәыршәаны реиқәыршәара.
Ҳаҭыр зқәу Аԥсны Аҳәынҭқарра аррамаҵзурауаа, Арбџьар мчқәа рветеранцәа, шәаргьы ишәзааигәоугьы зегьи ишәзеиӷьасшьоит агәабзиара, аҭынчра аихьӡарақәа!".
